نزیکەکانى ئێران لەبارەى مانەوەى ئەمریکا لە عێراق ناکۆکن

 

رۆژنامە عەرەبییەکان

 

 

شەرقلئەوسەت

نابێت لە کەرکوک هیچ لایەنێک فەرامۆش بکرێت

شاخەوان عەبدوڵا، جێگری دووەمى سەرۆکی پەرلەمانى عێراق لەسەر لیستى پارتى دیموکراتى کوردستان بە رۆژنامەى شەرقلئەوسەتى راگەیاند، هیچ لایەنێکى سیاسی لە کەرکوک ناتوانێت بە تەنها حکومەتى خۆجێی پێکبهێنێت، با زۆرینەشی بەدەستهێنابێت، چونکە پشتگوێخستن یان لەبەرچاونەگرتنى پێکهاتەیەکى کەرکوک رێگردەبێت لە سەقامگیریی پاریزگاکە لە هەموو روویەکەوە.
دەڵێت، دواخستنى پێکهێنانى حکومەتى خۆجێی کەرکوک لە بنەڕەتدا بۆ ئەوە بووە هەموو لایەنەکان بگەنە ئەنجامێک بە لاى هەمووانەوە پەسەندبێت، حکومەتى ناوەند چەند جارێک لە رێگەى سەرۆکوەزیرانەوە هەوڵیداوە چارەسەرى کێشەکە بکات، بەڵام هێشتا پێکهاتە و لایەنە سیاسییەکان نەگەشتوونەتە رێککەوتنى تەواوەتى.

 

 

 

عەرەبی جەدید

نزیکەکانى ئێران لەبارەى مانەوەى ئەمریکا لە عێراق ناکۆکن

بەرپرسێکى پلە باڵاى نزیک لە سەرۆکوەزیرانى عێراق بە عەرەبی جەدیدى راگەیاندووە، سودانى ناتوانێت لەبەرامبەر هێزە ئێرانییەکانى نێو عێراق بوەستێتەوە، بەڵام توانیوویەتى هەندێک لە کارەکانیان پەکبخات، بەتایبەتى ئەو پلانانەى کە لەدواى کوژرانى قاسم سولەیمانییەوە دانراوە.
محەمەد عەلى حەکیم، شرۆڤەکاری سیاسی عێراقی بە رۆژنامەکەى راگەیاندووە ناکۆکی نێوان لایەنە عێراقییەکانى نزیک لەئێران شتێکى نوێ نییە، هەیانە لەگەڵ ئەوەدایە ئەمریکیەکان بمێننەوە و هەندێکی دیکەشیان داواى دەرکردنى ئەمریکیەکان دەکەن، هەروەها راشیگەیاندووە روداوەکانى غەزە پەردەى لەسەر هەندێک لەو لایەنانە لادا و دەرکەوت جگە لە خۆ دەرخستن هیچ شتێکى ئەوتۆیان لەبارەدا نییە.

 

 

 

 

دەستوور

لە پەرلەمانى عێراق ناڕەزایەتى لەبارەى رێککەوتنەکانى بەغداد و ئەنقەرە سەریهەڵدا

ئیبتیسام هیلالی، ئەندامى لیژنەى کشتوکاڵ و ئاودێریی لە پەرلەمانى عێراق رەخنە لە رێککەوتنى ئەم دواییانەى نێوان سودانى و ئەردۆغان لەبارەى ئاوەوە دەگرێت و دەڵێت، رێککەوتنەکە مافى بەکارهێنانى تەواوەوتى ئاوى عێراقی داوەتە تورکیا.
رەخنەى ئەوەشیان گرتووە هەندێک لە بڕگەکانى نێو رێککەوتن و تێگەیشتنەکان ناڕوونن، بەتایبەتى لە دەستنیشانکردنى بڕی ئەو ئاوەى بەردەدرێتەوە بۆ عێراق، هەورەها دەسەڵاتى داوەتە کۆمپانیا تورکییەکان کە دەست لە کاروبارى ئاوى عێراق وەربدەن بەتایبەتى لەبارەى دروستکردنى بەنداو و رێڕەوى روبارەکانى.

 

 

 

جەریدە

دواى هێرشەکانى ئێران بۆ سەر ئیسرائیل خواست لەسەر چەکى ئێرانى زیادیکردووە

سەرچاوەیەکى باڵا لە وەزارەتى بەرگریی ئێران بە رۆژنامەى جەریدەى کوەیتى راگەیاندووە دواى هێرشەکەى ئێران بۆ سەر ئیسرائیل “شێتانە” خواست لە سەر کڕینى چەکی ئێرانى زیادیکردووە، بەتایبەتى فڕۆکەى بێفڕۆکەوان و موشەکى دوورهاوێژ.
دەڵێت، لە کۆبوونەوەى هەفتەى پێشووى شارى سان بوترسبۆرگی روسی و بە بەشداریی عەلی ئەکبەر ئەحمەدیان ئەمینداری گشتى ئەنجومەنى ئاسایشی نیشتمانى ئێران، 15 وڵات داواى کڕینى فڕۆکەى بێفرۆکەوان و موشەکى دوورهاوێژیان لە ئێران کردووە.
سەرچاوەکە باسی لەوەشکردووە ژمارەیەک لەو وڵاتانە پێشتر کڕیارى چەکی ئێرانى بوون و ژمارەیەکى دیکەشیان وڵاتانى نوێن، هەر لەو میانەیەدا ئەنجومەنى ئاسایشى نیشتمانى ئەمریکا رایگەیاند ئێران بەردەوامە لە ناردنى فرۆکەى بێفرۆکەوان بۆ روسیا.

 

 

 

 

 

 

رۆژنامە تورکییەکان

 

 

 

سەباح

گەورەترین بۆری گازى ئەوروپا بە تورکیادا تێپەڕدەبێت

کۆمپانیاى کاڵیۆن واژووى لەسەر پڕۆژەى گازی سروشتی بۆ رۆمانیا و یەکێتی ئەوروپا کرد، ئەم بۆرییە وابڕیارە لەساڵى 2025 تەواو بێت لە ناوچەى قەرەدەنیزەوە تاوەکو رۆمانیا بە درێژایی 308 کیلۆمەترە.
بەگوتەى پسپۆڕانی ئابوورى، بەهاى ئەم پڕۆژەیە 500 ملیۆن یۆرۆیە.

 

 

 

سۆزجو

سەرۆکى جەهەپە هەشت دۆسیە دەداتە ئەردۆغان

بڕیارە لەم هەفتەیەدا ئۆزگور ئۆزال، سەرۆکى جەهەپە لەگەڵ رەجەب تەیب ئەردۆغان، سەرۆککۆمارى تورکیا کۆببێتەوە.
ئۆزال بە رۆژنامەى سۆزجوی گوتووە، هەشت دۆسیەم ئامادەکردووە تاوەکو لەگەڵ سەرۆکى تورکیا گفتوگۆی لەسەر بکەین، لەوانەش: مووچەى خانەنشینیان، دامەزراندنى مامۆستایان. پێداچونەوە بە دۆسیەى دادگایی جان ئەتای، قەرزە بەجێماوەکانى شارەوانییەکانى ئاک پارتى و چەند پرسێکی دیکە.

 

 

 

یەنى شەفاق

سەردانەکەى ئەردۆغان بۆ ئەمریکا دواخرا

بڕیار بوو لە نۆی ئایاردا رەجەب تەیب ئەردۆغان، سەرۆککۆمارى تورکیا سەردانى واشنتن بکات و لەگەڵ جۆ بایدن، سەرۆکى ئەمریکا کۆببێتەوە، بەڵام ئەردۆغان رایگەیاندووە، لە تەمموزى ئەمساڵ لە چوارچێوەى کۆبوونەوەى لوتکەى ناتۆ لە ئەمریکا، سەردانەکەى ئەنجامدەدات و چاوی بە بایدن دەکەوێت.
بەگوێرەى چەند سەرچاوەیەک هۆکارى دواخستنەکە پەیوەندی بە هەڵبژاردنەکانى ئەمساڵى ئەمریکا و ئەگەرى ناڕەزایی و خۆپیشاندانى یەهودییەکانى ئەمریکایە لە بەرامبەر ئەردۆغان هەیە.

 

 

 

جمهورییەت

تادێت کۆمپانیاکان مایەپوچ دەبن

بەهۆى خراپی دۆخی ئابوورى و سیاسەتی حکومەتەوە، بەگوێرەى ئامارەکان ژمارەى کۆمپانیاکان لە سێ مانگی ئەمساڵدا بە بەراورد بە ساڵی رابردوو، سەدا 15.5 کەمیکردووە. لەو ماوەیەشدا ژمارەى ئەو کۆمپانیایانەى داخراون سەدا 26.6 بووە. هەروەها ژمارەى کۆمپانیا بیانییەکانیش بەشێوەیەکی بەرچاو رێژەکەیان کەمبووەتەوە.

 

 

 

 

رۆژنامە فارسییەکان

 

 

 

کەیهان

جگەرەی ئەلیکترۆنی هیچکات مۆڵەتی پێنادرێت

وەزارەتی تەندروستی ئێران رایگەیاند، ناچێتە ژێر باری پێدانی مۆڵەت بۆ جگەرەی ئەلیکترۆنی، ئەو جۆرە جگەرەیە بە قاچاخ دادەنرێت و شەڕی جگەرەی ئەلیکترۆنی لە بەرنامەی کاری دوو وەزارەتی “تەندروستی و بازرگانی”دایە.

 

 

 

 

مەردوم سالاری

سەرۆکی دادگای باڵا: غەیرە موسڵمانیش دەبت حیجاب بێت

محەممەد جەعفەر مونتەزری، سەرۆکی دادگای باڵای ئێران رایگەیاند، حیجاب ئەرکێکی شەریعەت و یاساییە لە کۆمەڵگای ئیسلامی، بۆیە چاوەڕوانی ئەوە دەکرێت تەنانەت ئەوانەی موسڵمان نین جێبەجێی بکەن.
مونتەزری لە کۆبوونەوەی دەستەی گشتیی دادگای باڵای ئێراندا رێنمایی دادوەرانى کرد و گوتى، لە دۆسیەکانى پەیوەست بە پاراستنی حیجابدا بنەمای رێگریکردن لە تاوان بەکاربهێنن و بڕیارێک بدەن ببێتە وانە بۆ کەسانی دیکە.

 

 

 

 

کیمیای وەتەن

وێستگەکان ئامادەدەکرێن بۆ زیادکردنى بەرهەمهێنانى کارەبا لە وەرزی هاویندا

عەلی ئەکبەر مێهرابیان، وەزیری وزەی ئێران رایگەیاند، زۆربەی وێستگەکانی کارەبا چاککراونەتەوە و سەرجەم وێستگەکانی بەرهەمهێنانى کارەبای وڵات لە بەرزترین ئاستى توانای خۆیاندا دەبن بۆ بەرهەمهێنانى کارەبا لە وەرزى هاویندا.
مێهرابیان گوتی، بە لەبەرچاوگرتنی دەستپێکی وەرزی گەرما، وێستگەکانی کارەبای وڵات ئامادە دەکەین بۆ بەرهەمهێنانی کارەبای سەقامگیر و متمانەپێکراو لە سەرتاسەری وڵاتدا و بە درێژایی شەو و رۆژ.
ئاماژەی بەوەشکرد، لە ساڵی رابردووەوە 180 پڕۆژە جێبەجێ کراون بۆ دابینکردنی کارەبای جێگیر.

 

 

 

ئاسیا

بانکی ئایندە 12 هەزار هاوسەری بە یەک گەیاندووە

لە ساڵی رابردوودا بانکی ئایندە بە پێدانی قەرزی هاوسەرگیری، ئاستێکی لەباری تۆمارکردووە.
بەگوێرەی راپۆرتی پەیوەندییە گشتییەکانی بانکەکە لە ماوەی یەک ساڵدا زیاتر لە 12 هەزار قەرزی هاوسەرگیری داوە بە هاوسەرە گەنجەکان.
پێدانی قەرزی هاوسەرگیری لە ماوەی یەک ساڵدا بەڕێژەی %20 زیادىکردووە کردووە، ئەمەش پشتیوانی و گرنگیدانی بە ئاسانکاری بۆ هاوسەرگیری گەنجان و بەهێزکردنی بنەماڵە دەردەخات.

 

 

 

 

 

رۆژنامە ئینگلیزییەکان

 

 

دەیلی مەیل

ئەم زەردەخەنەیە پێماندەڵێت پادشا دەگەڕێتەوە سەر کارەکەی

پاشا لەگەڵ شاژندا قۆڵیان کردووە بە قۆڵی یەکتردا، هەردووکیان خۆشحاڵ دیارن، پێکەوە ئەم وێنەیەیان لە کۆشکی پەکینگهام گرتووە.
دوێنێ پاشا دانیشتنێکی دیکەى وەرگرتنی چارەسەری نەخۆشیی شێرپەنجەی لەگەڵ پزیشکەکانیدا هەبوو. ئەوان بە پادشا چارڵزیان گوت، دەتوانێت کار و چالاکییە رۆژانەکانی خۆت دەستپێبکەیتەوە، بەڵام لەئاستێکی سنوورداری وەهادا کە کێشە بۆ چاکبوونەوەکەی دروست نەکات.

 

 

 

 

دەیلی تەلەگراف

لەکاتی رۆژگارە سەختەکاندا شاژن وەک قەڵایەکی پۆڵایین وابوو بۆ پادشا

پێکەوە بە قۆل لە قۆڵی یەکتریدا دەرکەوتن، شاژن بەرگە شینە پاشاییەکەی لەبەردایە، دەڵێی هەر خەمێکیش لەودنیایە ناخۆن. وێنەکەیان لە بۆنەی یەکەمین ساڵیادی تاج لەسەرنانی پاشادا بڵاوبووەتەوە، هەندێک ئاسوودەیی پێوەدیارە، بەڵام بێخەمیش نییە. وێنەکەیان رۆژی 10ـى نیسان لەنێو باخەکەی کۆشکی پاکینگهامدا گیراوە، کە بۆنەی 15ـهەمین ساڵڕۆژی هاوسەرگیریکردنەکەیانە. هونەرێک لە وێنەگرتنەکەیاندا بەکارهێنراوە، کە خەم و خۆشیشی تێکەڵکردووە.

 

 

 

 

واشنتن پۆست

لەنێو شەپۆلەکانی ترسدا بروسکەی هیوا دەردەکەوێت

گفتوگۆکانی ئاگربەست لە غەزە دەستپێدەکەنەوە و هێشتاش ئیسرائیل هەر چاوی لەسەر رەفەحە.
لە سەرەتاکانی ئەم مانگەوە شەڕی غەزە رووی لە کزبوون کردووە، سوپای ئیسرائیل هێزەکانی خۆیی لە چەند ناوچەیەک کێشاوەتەوە. ئەمەش دەروازەیەک واڵا دەکات بۆئەوەی یارمەتییە مرۆییەکان بتوانن بچنە ژورەوە و بگەن بەو شوێنانەی زۆر پێویستیان پێیەتی، رەنگە ئەمە بروسکەیەکی بینینی رۆشنایی بگەڕێنتەوە ناو چاوی ماندووی خەڵکی غەزە.

 

 

 

 

وۆڵ ستریت جۆرنەڵ

خۆپیشاندانەکان فراوانبونەتەوە، بۆیە زانکۆکانیش رێوشوێنەکانی خۆیان تووندتر دەکەنەوە

ئەو وێنەیە پێمان دەڵێت لە زانکۆی ئیمۆری لە ویلایەتی ئەتلەنتا پۆلیس خوێندکارێکی خۆپیشاندەر دەستگیر دەکات. رۆژی پێنج شەممە پشتیوانانی فەلەستین لە دژی شەڕی غەزە درێژەیان بە خۆپیشاندانەکانیان دا. زانکۆی باشووری کالیفۆرنیاش لەبەرهۆکاری ئەمنی چەند بۆنەیەکی خۆیی دواخست، کە بڕیاربوو بۆ خوێندکارەکانیی ئەنجام بدات.