زووم:
دەستەی دەستپاکیی هەرێمی کوردستان رایگەیاند، لە ماوەی چوار ساڵی رابردوودا 897 دۆسیەی گەندەڵی رەوانەی دادگە کراون.
ئەحمەد ئەنوەر، سەرۆکی دەستەی دەستپاکی هەرێمی کوردستان لە گۆنگرەیەکی ڕۆژنامەوانیدا ئاماری دۆسیەکانی گەندەڵی ئاشکراکرد و رایگەیاند، هەزار و 10 دۆسیەی گەندەڵی لەژێر لێکۆڵینەوەدایە و ئەمساڵ 230 دۆسیە رەوانەی دادگە کراون.
گوتیشی، نزیکەی 400 بۆ 500 دۆسیە لە بەردەستدان و بەشێکیان بەهۆی نەبوونی بەڵگەوە تائێستا بەبێ بەرەوپێشچوون ماوەتەوە و بەشێکیشیان رەوانەی دادگە کراون.
ئەحمەد ئەنوەر ئاشکراشیکرد، 23 تاوانبار سزای راگرتنی جێبەجێکردنیان بۆ دەرچووە، کە بە گوتەی خۆی تێبینیان لەسەر بریارەکە هەیە.
