زووم
کۆما جڤاکێن کوردستان (کەجەکە) بەبۆنەى 35هەمین ساڵڕۆژى کیمیابارانکردنى هەڵەبجە راگەیەندراوێکى بڵاوکردەوە و دەڵێت، کۆمەڵکوژیی هەڵەبجە لە چوارچێوەی پلانی جینۆساید و قڕکردنی کورد ئەنجامدراوە و ئیستاش کیمیابارانکردنی کورد بەردەوامە.
هاوسەرۆکایەتیی دەستەی بەڕێوەبەری کەجەکە دەڵێت، “گەلی کوردستان هەرگیز هەڵەبجە و ئەو هەزاران کەسەی لە کۆمەڵکوژی هەڵەبجەدا ژیانیان لەدەستداوە، لەبیرناکات”.
“یادی هەموو شەهیدانی شۆڕش و دیموکراسی بە رێزەوە دەکەینەوە و بەڵێن و پەیمانی سەرکەوتن و سەرفرازی بۆ شەهیدان دووبارە دەکەینەوە”.
کەجەکە لە راگەیەندراوەکەیدا باسی روداوە مێژووییەکانى پەیوەست بە کوردى کردووە و دەڵێت، لە سەرەتای سەدەی بیستدا “هێزە ئیمپریاڵیستییەکان و دەوڵەتانی کۆلۆنیالیستی پاکتاوکەر” رێککەوتن و کوردستانیان دابەشکرد. کوردستان بە پەیماننامەی لۆزان کە پێدەنێینە سەدەم ساڵەیەوە دابەشکرا و گەلی کورد خرایە نێو پڕۆژەی نکۆڵی و سڕینەوەوە.
لەو سەدەیەدا “هێزە کۆلۆنیالیستییە قڕکەرەکان لە کوردستان بە دەیان کۆمەڵکوژییان کرد و بە سەدان هەزار کورد کوژران، نکۆڵی لە زمان، ناسنامە و هەبوونی کورد کرا. کۆمەڵکوژیی هەڵەبجەش کە لە مێژووی مرۆڤایەتیدا یەکێک لە بە ئازارترین کۆمەڵکوژییەکانە، لەو چوارچێوەیەدا ئەنجامدرا.”
رۆژى 16ى ئازارى 1988 حکومەتى بەعس هەڵەبجەى کیمیاباران کرد و بەهۆیەوە زیاتر لە پێنج هەزار هاوڵاتى بوونە قوربانی.
کەجەکە دەڵێت، سەرباری ئەوەی کۆمەڵکوژیی هەڵەبجە بە بەرچاوی جیهانەوە ئەنجامدرا، هیچ کەس ناڕەزایەتی نیشان نەدا و کاردانەوەی نەبوو. “هێزەکانی مۆدێرنیتەی سەرمایەداری لەسەر بنەمای بەرژەوەندییەکان پەیوەندییان لەگەڵ هێزە قڕکەرەکان دانا و بەوهۆیەوە لەبەرامبەر کۆمەڵکوژکردنی کورد بێدەنگ بوون”.
دەشڵێت، “ئەو بێهەڵوێستیپەی هێزەکانی مۆدێرنیتەی سەرمایەداری لە بەرامبەر سیاسەتی قڕکردن و کۆمەڵکوژکردنی کوردان لەمڕۆشدا بەردەوامە. سەرەڕای ئەوەی دەزانرێت دەوڵەتی تورکیای کۆلۆنیالیست چەکی کیمیایی لە دژی گەریلاکانی کوردستان بەکاردەهێنێت، بەڵام هەموو دەوڵەتەکان بەتایبەتی ئەمریکا و دەوڵەتانی ئەوروپا بێدەنگن و سەرباری ئەو دۆخەش هەموو جۆرە پەیوەندییەکیان لەگەڵ دەوڵەتی تورکیا هەیە”.
لە راگەیەندراوەکەدا هاتوووە، “دەوڵەتانی جیهان نەک هەر لە بەرامبەر بەکارهێنانی چەکی کیمیایی لە دژی گەریلا، بەڵکو لە بەرامبەر رۆژئاڤا و باشووری کوردستان، هێرشەکانی سەر شنگال و مەخمور، بۆردومانی رۆژانەی سەر جوگرافیای کوردستان، گۆڕینی دیموگرافیا، دەستگیرکردنى کورد و تاڵانکارییەکان بێدەنگن”.
کەجەکە دەڵێت، ئەو هەڵوێستەی دەوڵەتان بە واتای پشتیوانیکردن لە سیاسەتی لەناوبردنی کورد دێت. گەلی کوردستان ئەمڕۆش لەژێر هەڕەشەی قڕکردندایە. “سیاسەتی قڕکردن و کۆمەڵکوژی لەسەر کوردان ئەمڕۆش بەردەوامە. دەسەڵاتداری ئاکەپە-مەهەپە لە رێگەی بە ئەنجامگەیاندنی قڕکردن لەسەر کوردان دەیەوێت هەبوونی کوردان بە تەواوەتی نەهێڵێت.”
کەجەکە داواى یەکڕیزى دەکات و دەڵێت، “گەلی کوردستان بە بەهێزکردنی یەکێتی خۆی و بەرزکردنەوەی تێکۆشانی ئازادی دەتوانێت لە بەرامبەر کۆمەڵکوژییەکان بوەستێتەوە و سیاسەتەکانی کۆمەڵکوژی پوچەڵ بکاتەوە”.
دەشڵێت، “واتادارترین و راستترین شت لە ساڵیادى کیمیابارانکردنى هەڵەبجەدا ئەوەیە لە دژی هێڵی هاوکار و خۆبەدەستەوەدان بن و لەپێناو یەکێتی نەتەوەیی گەلی کورد خەبات بکرێت. دەبێت هەموو وڵاتپارێزانی کوردستان بەو وشیاریی ئامانجەوە هەڵسوکەوت بکەن”.
