زووم:
سەرۆکی دادگای فیدراڵی دابەشکردنی مووچەی ئەو مووچەخۆرانەی هەرێمی کوردستان دووپاتدەکاتەوە، کە تاوەکو ئێستا بەبانکی نەکراون، دەڵێت، بە نەختی مووچەیان پێبدرێت.
لەتیف رەشید، سەرۆککۆماری عێراق و جاسم عەبود، سەرۆکی دادگای فیدراڵی کۆبوونەوە، سەرۆکایەتیی کۆمار لە راگەیەندراوێکدا دەڵێت، مووچەی فەرمانبەرانی هەرێمی کوردستان و چەند پرسێکی دیکە خراونەتە بەر باس.
سەرۆکایەتیی کۆمار رایگەیاندووە، دەسەڵاتەکانی هەرێمی کوردستان تەواوی دەسەڵاتیان بەسەر هەرێمی کوردستان و هاوڵاتییانیدا هەیە، بەو شێوەیەی پێچەوانەی دەستوور نەبێت.
لایخۆیەوە سەرۆکی دادگای فیدراڵی گوتوویەتی، دادگاکە پابەندە بەوە بنەمایانەی دامەزرێنەرانی پرۆسەی سیاسیی عێراق لەسەری رێککەوتوون و لە دەستووردا نووسراوەتەوە و پەیوەندیی نێوان دەسەڵاتی فیدراڵی و هەرێمەکانی رێکخستووە.
سەرۆکی دادگای فیدراڵی راشیگەیاندووە، رێکارەکانی دابەشکردنی مووچە بەڕێگەی ئەلیکترۆنی کاتی پێویستە، تاوەکو ئەو کاتەی رێکارەکان تەواودەبن، حکومەتی عێراق بەردەوامبێت لە دابەشکردنی مووچەی فەرمانبەرانی هەرێمی کوردستان بەشێوەی نەختی.
