زووم:
ئەمڕۆ شەممە، 7ی کانوونی دووەمی 2023، هاوکات لەگەڵ جەژنی قەوڵتاسی کاکەییەکان، هونەرمەند رووبار رەشید کاکەیی، بەرهەمێکی تایبەتی بەو بۆنەیەوە بڵاوکردەوە.
گۆرانییەکە بەناوی “جەژنی یارانەن” لە ئاوازی کاروان محەمەد و تێکستی نامیق هەورامییە، کلیپی گورانییەکەش لە گوندی هاواری سەر بە پارێزگای هەڵەبجە وێنەگیراوە، کە شوێنی نیشتەجێبوونی کاکەییەکانە، هەردێ سەمیر کاری دەرهێنانی بۆ کردووە.
رووبار رەشید کاکەیی، ساڵی 1987 لە کەرکوک لەدایکبووە، وەکو خۆی دەڵێت، دەیەوێت لە رێگەی هونەرەوە پەیامی کاکەییەکان بگەیەنێتە جیهان.
ساڵی 2020 یەکەم بەرهەمی خۆی بە ناوی “هاواری کاکەیی” بە زاراوەی ماچۆ بڵاوکردەوە، خاوەنی چەند بەرهەمێکی دیکەى هونەرییە.
جەژنی قەوڵتاس یان سێ شەوەی یاران
یارانی قەوڵتاس حەوت کەس بوون، سوڵتانی یارسانەکان (سوڵتان سوهاک) بۆ کاروباری کۆمەڵایەتیی هەڵیبژاردبوون کە بریتی بوون لە “قولی، شابدین، شاکە، شا نەزەر، عیسا، شاموراد و پیرە دلاوەر”.
رۆژێک ئەو حەوت کەسە لە پارێزگای ئازەربایجانی ئێرانەوە بەرەو لای سوڵتان دەڕۆن لە ناوچەی هەورامانی رۆژهەڵاتی کوردستان، لە نزیک کێوی شاهۆ لە پاوە، زۆر ماندوو دەبن و دەڵێن، “ئەگەر سوڵتان سوهاک حەقە با خۆی بێتە ئێرە بۆ پێشوازییمان”.
یارسانەکان باوەڕیان وایە “سوڵتان سوهاک حەقە و ئاگاداری هەموو قسە و گوفتار و کردارێکە”، بۆیە لێیان تووڕە دەبێت و بە هۆی توڕەییەکەی، بەفرێکی زۆر بەسەریان دەبارێت و دەبن بە ژێر بەفر و بۆ ماوەی سێ شەو و سێ رۆژ لەژێر بەفر دەبن.
دواتر سوڵتان، مستەفا داودان دەنێرێتە لایان تا هەورێک دەبارێنێت و لە ژێر بەفرەکە دێنە دەرەوە و زیندوو دەبنەوە و سوجدەی سوپاسگوزاری دەبەن بۆ سوڵتان سوهاک، بەپێی گێڕانەوەی یارسانەکان، مستەفا داودان فریشتەی رۆحکێشانە.
کاکەییەکان وەکو شوکرانەى رزگاربوون سێ رۆژ بەڕۆژوو دەبن و دواتر دەیکەن بە جەژن
ئەو یارسانانەی کە “سێ رۆژی یارانی قەوڵتاس” بەڕۆژوو دەبن، بڕوایان وایە لەوکاتەوە بە ئەمری سوڵتان سوهاک و بە شوکرانەی رزگاربوونی یاران، بەڕۆژووبوون لەو سێ رۆژەدا بەسەریاندا واجب کراوە و لە شەوی سێیەم دەبێتە جەژنیان و رێوڕەسمی جەژن دەگێڕن.
کاتی بەڕۆژووبوونی قوڵتاسی لە چواردەیەم رۆژی چلەی زستان دەستپێدەکات تاوەکو حەڤدەیەمین رۆژی چلەی زستان.
رێوڕەسمەکانی جەژنی قەوڵتاس لە پێنج رۆژی یەک لەدوای یەک بەڕێوەدەچن، خواردنەکانی جەژن برنج و کەڵەشێرن بە رۆنی حەیوانی لە هەر شەوێکدا.
نانی پیرۆزی “گردە”، قوربانیکردنی مەڕ، نانی تیری و شوکرانە کە بریتین لە هەنار و شەکر و نەبات، دەبرێنە خزمەتی جەم و لە رێوڕەسمی جەم و لە جەمخانە پیرۆز دەکرێن.
