وەزیرانی دەرەوە و بەرگریی سوریا لە یەکەم سەردانی فەرمی گەیشتنە سعودیە

زووم…

شاندێکی سوریا بە سەرۆکایەتی ئەسعەد حەسەن شەیبانی، وەزیری دەرەوەی حکومەتی کاتیی سوریا گەیشتە ریازی پایتەختی سعودیە.

شەیبانی لە ئێکس بڵاویکردەوە، بە یاوەری مرهف ئەبو قەسرە، وەزیری بەرگری و ئەنس ختاب، سەرۆکی هەواڵگری لە حکومەتی کاتیی سوریا بە سەردانێکی فەرمی گەیشتوونەتە ریاز.

شەیبانی دەڵێت، لەڕێی یەکەمین سەردانمان لە مێژووی سوریای ئازاد دەمانەوێت لاپەڕەیەکی نوێ و پرشنگدار هەڵبدەینەوە لە پەیوەندییەکانی نێوان سوریا و سعودیە بەوجۆرەی شایان بە مێژووی دێرینی نێوان دوو وڵاتەکە بێت.

لەدوای کەوتنی بەشار ئەسەدەوە لە سەرەتای مانگی رابردوو، ئەمە یەکەم سەردانی نوێنەرانی دەسەڵاتی نوێی سوریایە بۆ دەرەوەی وڵات.