ئەمشەو لیڤەرپوڵ و ریاڵ مەدرید یارى لوتکە دەکەن، ئەستۆن ڤێلاش میواندارى یۆڤانتۆس دەکات.
لە بەردەوامى یارییەکانى جەولەى پێنجەمى قۆناغى یەکەمى چامپیۆنز لیگ، ئەمشەو لە دوو کاتى جیاوازدا نۆ یارى دیکە بەڕێوەدەچن، لە کاتژمێر ١١دا و لە یارى لوتکەى شەوەکەدا، لیڤەرپوڵى ئینگلیزى لە یاریگاى ئەنفیڵد، میواندارى ریاڵ مەدریدى ئیسپانى دەکات.
ریدز هەوڵ دەدات بەسوودوەرگرتن لە یاریگا و هاندەرەکانى سێ خاڵى یارییەکە بەدەستبهێنێت و پارێزگارى لە پێشەنگى ریزبەندى خولەکە بکات، کە لە ئێستادا بەکاتى لەدەستیداوە، هاوکات یانە مەدریدیەکەش دەیەوێت قەرەبووى شکستى گەڕى چوارەم بکاتەوە و هەنگاو بەرەو پلەکانى سەرەوەى ریزبەندیەکە بنێت.
لە هەمان کاتدا و لە یارییەکى دیکەى بەهێزدا، ئەستۆن ڤێلاى ئینگلیزى لە یاریگاى ڤێلا پارک لە شارى بێرمینگهام، بەرامبەر یۆڤانتۆسى ئیتاڵى یارى دەکات.
لە یارییەکانى دیکەشدا، بروسیا دۆرتمۆندى ئەڵمانى دەبێت بە میوانى دینامۆ زەگربى کرواتى، مۆناکۆى فەڕەنسى و بەنفیکاى پۆرتوگالیش لە یاریگاى دا لوز لە لشبۆنەى پایتەخت، رووبەڕووى یەکدەبنەوە.
