راوێژکارێکی ئەردۆغان: لە تورکیا پرسی کورد بوونى نەماوە

زووم..

محەمەد ئوچوروم گەورە راوێژکاری رەجەب تەیب ئەردۆغان، سەرۆککۆماری تورکیا رایگەیاند، لە تورکیا پرسی کورد بوونی نەماوە و تەنها لە دەرەوەی خاکی تورکیا پرسی کورد بوونی هەیە.

بەگوێرەی رۆژنامەی یەنی بیرلیک، راوێژکارەکەی ئەردۆغان گوتویەتی، ئەو وڵاتانەی باس لە پرسی کورد لە تورکیا دەکەن داگیرکەرن و دەیانەوێت لەو رێگایەوە تورکیا لاواز بکەن و  خاکەکەشی دابەش بکەن.

محەمەد ئوچوروم راشیگەیاندوە: بابەتی پێکهێنانی قەوارە بۆ کورد لە سوریا پڕۆژەیەکی وڵاتانی داگیرکەرە.

پێشتریش محەمەد ئوچوروم لێدوانی دژی کورد هەبووە و هەفتەی رابردوو لە چاوپێکەوتنێکدا رایگەیاند، لە تورکیا تەنها گەلی تورکی بوونی هەیە و گەلان بوونیان نییە، تەنها زمانی تورکی وەک زمانی باڵادەست و فەرمی دەناسرێت.