فەرماندەیی ئۆپەراسیۆنەکانی عێراق: لە کەرکوک پێنج چەکداری داعش کوژرا

زووم..

فەرماندەیی ئۆپەراسیۆنەکانی عێراق رایگەیاند، مۆڵگەیەکی چەکدارانى داعشیان لە  دۆڵی زغەیتون لە رۆژئاوای کەرکوک بۆردومان کردووە و پێنج چەکداری داعش کوژراون.

بەگوێرەى راگەیەنراوی فەرماندەیی ئۆپراسیۆنەکانى عێراق،  لە چوارچێوەی ئۆپەراسیۆنەکانی کەرکوک و بە فڕۆکەى جۆری ئێف 16، بەرەبەیانى ئەمڕۆ مۆڵگەیەکی چەکدارانى داعش کرایە ئامانج و پێنج چەکداریان کوژراون.

راگەیەنراوەکە ئاماژە بۆ ئەوە دەکات،  کاتژمێر پێنجی بەیانی ئەمڕۆ،  فەوجەکانی یەک و لیوای 63ـی هێزە تایبەتەکان و فەوجی هەواڵگریی فیرقەی 11ـی سەر بە بەڕێوەبەرایەتی هەواڵگریی سەربازیی، بە پاڵپشتی فڕۆکەی جۆری ئێف 16 هەڵمەتێکیان لە ناوچەکە ئەنجامداوە، تەرمی پێنج  چەکداریان دۆزیوەتەوە، لەگەڵ دوو  تفەنگ و دوو پشتێنی بۆمبڕێژکراو، هەروەها دەستیان بەسەر کۆمەڵێک بابەتى دیکەى تەقەمەنى و ئامێری پەیوەندی گرتووە.