“ئێران فەرمانی داڕشتنی پلانێکی داوە بە هاووڵاتییەکی ئێرانی بۆ تیرۆرکردنی ترەمپ”

زووم_

وەزارەتی دادی ئەمریکا رایگەیاند، سوپای پاسدارانی ئێران فەرمانی داڕشتنی پلانێکی داوە بە هاووڵاتییەکی ئێرانی بۆ ئەوەی دۆناڵد ترەمپ تیرۆر بکات.

بەگوێرەی راگەیەندراوەکە، بەرپرسێک لە سوپای پاسدارانی ئێران، لە مانگی ئەیلول، فەرمانی بە یەکێک لە بریکارەکانی بە ناوی فەرهاد شاکری کردووە بۆ ئەوەی چاودێریی جووڵەکانی دۆناڵد ترەمپ بکات و بیکوژێت.

وەزارەتی داد دەشڵێت، بەرپرسەکەی سوپای پاسداران بە فەرهاد شاکری گوتووە، ئەگەر تاوەکو حەوت رۆژ پلانێک بۆ کوشتنی ترەمپ دانەنێت، ئەوا تاران پلانەکانی بۆ دوای هەڵبژاردنی سەرۆکایەتیی ئەمریکا دوادەخات، چونکە دڵنیا بوون لەوەی ترەمپ هەڵبژاردنەکە دەدۆڕێنێت، ئەوکات تیرۆرکردنیشی ئاسان دەبێت.

لە لێکۆڵینەوەکاندا، فەرهاد شاکری بە ئێف بی ئای گوتووە، نیازی نەبووە لەو وادەیەی بەرپرسەکەی سوپای پاسداران بۆی دیاری کردووە، هیچ پلانێک پێشکەش بکات.

بەگوێرەی راگەیەندراوەکەی وەزارەتی دادی ئەمریکا، ئەو هەوڵەی تاران بۆ کوشتنی دۆناڵد ترەمپ، بۆ تۆڵەکردنەوە بووە لە کوشتنی قاسم سولەیمانی، فەرماندەی سوپای پاسدارانی ئێران لە ساڵی 2020.