زووم..
ئاژانسی رۆیتەرز لە زاری دوو بەرپرسی ئەمنی فەلەستین بڵاویکردەوە، بەرەبەیانی ئەمڕۆ ئیسرائیل کەمپی پەنابەرانی فەلەستینی لە باشووری لوبنان بۆردومانکردووە و مونیر مەقدەح، فەرماندەی باڵی لوبنانی کەتائیبی شوهەدای ئەقسا باڵی سەربازی بزوتنەوەی فەتحی فەلەستینی کردووەتەئامانج.
بەگوێرەی زانیارییەکانی رۆیتەرز، تاوەکو ئێستا چارەنووسی مونیر مەقدەح نادیارە، سەرچاوەکان دەڵێن ئیسرائیل لەو بۆردومانەدا باڵەخانەیەکی لە کەمپی عەین حلوەی پەنابەرانی فەلەستین لە باشووری لوبنان کردووەتەئامانج.
ئەمە یەکەمجارە کەمپی عەین حلوە کە گەورەترین کامپی پەنابەرانی فەلەستینە لە لوبنان لەماوەی ئەمساڵدا بۆردومان بکرێت.
لەلایەکی دیکەوە بەرپرسێکی کەمپەکە بە ئاژانسی فرانس پرێسی گوتووە، لەو بۆردومانەکەدا ماڵی کوڕەکەی مونیر مەقدەح کراوەتەئامانج، ئەویش دەڵێت تاوەکو ئێستا دیار نییە مونیر مەقدەح ماوە یان گیانی لەدەستداوە.
