بۆرێڵ: وادیارە هیچ هێزێک بە ئەمریکاشەوە نەتوانێت نەتانیاهۆ لە جەنگ رابگرێت 

زووم..

بەرپرسی سیاسەتی دەرەوەی یەکێتی ئەوروپا دەڵێت، نیگەرانە لەوەی هیچ هێزێک بە ئەمریکاشەوە ناتوانێت بنیامین نەتانیاهۆ لە جەنگی غەزە و لوبنان رابگرێت.

جۆزێپ بۆریڵ، لە کۆنفرانسێکی رۆژنامەنووسیدا لە نیویۆرک گوتی، ئەوەی دەستمان داوەتێ بەکارهێنانی فشاری دیپلۆماسییە بۆ ئاگربەست، بەڵام پێدەچێت هیچ کەس نەتوانێت نەتانیاهۆ رابگرێت.

بەگوێرەی ئاژانسی فرانس پرێس، بۆرێڵ پێشنیازەکەی فەرەنسای بۆ ئاگربەستی جەنگی ئیسرائیل و لوبنان بۆ ماوەی ٢١ رۆژ پەسەندکردووە، بەڵام ئیسرائیل نەک هەر قبووڵی نەبوو، بەڵکو هیرش و بۆردومانەکەی بۆسەر لوبنان چڕترکردەوە.

دەشڵێت ئەمریکا چەندین جار هەوڵی ئاگربەستی داوە و بێسوود بووە، ئێستاش ئیسرائیل لێناگەڕێت تاوەکو لوبنانیش بە دەردی غەزە نەبات و پاساوەکەشی کۆتاییهێنانە بە حزبوڵای لوبنان.