مارتین ئۆدیگاردی نەرویجی و ناوەڕاستکاری یانەی ئارسناڵی ئینگلیزی بەهۆی پێکانەوە بۆ ماوەی سێ هەفتە لە یاریکردن دادەبڕێت.
ئەوەش دوای ئەوەی ناوبراو لە یاری هەڵبژاردەکەی بەرامبەر هەڵبژاردەی نەمسا بە پێکانەوە یاریگای جێهێشت.
رۆژنامە وەرزشییەکانی نەرویج ئاماژەیان بەوەکردووە، ئۆدیگارد لانیکەم تا سەرەتای مانگی داهاتوو ناتوانێت بگەڕێتەوە یاریگاکان و بەوەش لە سێ یاری گرنگی ئارسناڵ بێبەش دەبێت کە دووانیان لە خولی ئینگلیزین بەرامبەر یانەکانی تۆتنهام و مانچێستەر ستی و یاریەکەی دیکەش بەرامبەر ئەتڵەنتای ئیتاڵییە لە خولی یانە پاڵەوانەکانی ئەوروپا.
ئارسناڵ بەباشی دەستی بە وەرزی نوێی پریمەرلیگ کردووە و لە سێ یاریدا حەوت خاڵی کۆکردووەتەوە، بەڵام دوورکەوتنەوەی دیکلاین رایس بەهۆی وەرگرتنی کارتی سوور و پێکانەکەی ئۆدیگارد و کالافیۆری لە هەفتەی فیفا رەنگە گرفت بۆ تۆپچییەکان دروست بکەن لە یارییەکانی داهاتوودا.
