زووم..
زوومی سلێمانی گواستییەوە، ئەمڕۆ جارێکی دیکە لە بەنزیخانەکانی سلێمانی نرخی هەر سێ جۆرەکەی بەنزین 25 دیناری دیکە بەرزبوەوە و تەنها لە ماوەی دوو هەفتەدا 75 دینار چووەتە سەر نرخی هەر سێ جۆرەکەی.
دەشڵێت، لە ئێستادا لیترێک بەنزینی نۆرماڵ بە 925 دینار، موحەسەن هەزار و 125 دینار و سۆپەریش بە هەزار و 275 دینارە.
بەشێک لە خاوەن بەنزینخانەکانیش دەڵێن هۆکاری بەرزبونەوەکە بۆ کەمی بەنزینی هاتوو لە دەرەوە و زۆربوونی خواست لەسەری دەگەڕێتەوە و بە دووری نازانن زیاتریش بەرزبێتەوە.
جگە لە سلێمانیش، لە هەولێر و دهۆکیش نرخی هەر سێ جۆرەکەی بەنزین بەرزبووەتەوە و لە هەولێر بەهۆی گرانبوونی نرخی بەنزینەوە لە بەنزینخانەکان نۆرەگرتن بۆ وەرگرتنی بەنزین سەریهەڵداوەتەوە، بەگوتەی بەشێک لە شۆفێرانیش، لەگەڵ زیادبوونی نرخەکەیدا کوالێتی بەنزینەکەش خراپ بووە.
ئەوەش لەکاتێکدایە کە لە پارێزگای کەرکوک و پارێزگاکانی دیکەی عێراق نرخی لیترێک بەنزینی نۆرماڵ بە 450 دینارە و موحەسەنیش بە 850 دینارە.
