زووم..
سوپای ئەمریکا رایگەیاند، کەشتی فڕۆکەهەڵگری یوئێس ئێس ئەبراهام لینکۆڵن گەیشتە رۆژهەڵاتی ناوەڕاست، ئەمەش دوای ئەوە دێت لوید ئۆستن، وەزیری بەرگری ئەو وڵاتە فەرمانی بە کۆمەڵەی دەریاوانە جەنگییەکان کرد بەپەلە بەرەو ئەو ناوچەیە بڕۆن.
بەگوێرەی لێدوانی فەرماندەیی سەربازی ئەمریکا لە رۆژهەڵاتی ناوەڕاست کەشتی ئەبراهام لینکۆڵن چەندین فڕۆکەی جەنگی لە جۆرەکانی ئێف 35 و ئێفئی 18 و بلۆک 3ـی هەڵگرتووە، ئاماژەی بەوەش کرد، کە لینکۆڵن کەشتیی سەرەکی فڕۆکەهەڵگری کۆمەڵەی سێیە.
بەگوێرەی هەواڵێکی رۆژنامەی شەرقولئەوسەت کەشتی لینکۆڵن دەبێتە دووەم فڕۆکە هەڵگری ئەمریکا، ئەگەریشی هەیە جێگای کەشتی رۆزفێڵت بگرێتەوە.
رۆژنامەکە ئاماژەی بەوەشکردووە، کەشتی جەنگی دیسرۆن 21 و سیڤی دەبلیوی نۆیەم هاوەڵی دەکەن.
هاتنی ئەم کەشتیە هاوکاتە لەگەڵ زیادبوونی گرژییەکانی رۆژهەڵاتی ناوەڕاست، بەتایبەت دوای کوژرانی ئیسماعیل هەنیە سەرکردەی حەماس و فوئاد شوکری فەرماندەی سەربازی حزبوڵڵای لوبنان.
