بەڕێوەبەرایەتیی هاتوچۆی سلێمانی ماوەی دوو کاتژمێر راییکردنی مامەڵەکانی راگرت

زووم..

ئەمڕۆ کارمەندانی بەڕێوەبەرایەتی هاتوچۆی سلێمانی بەهۆی دواکەوتنی مووچەکانیانەوە، بۆ ماوەی دوو کاتژمێر بایکۆتی کارەکانیان کرد.

زوومی سلێمانی لەبەردەم بەرێوەبەرایەتی هاتوچۆی سلێمانی ئەوەی گواستەوە، لە کاتژمێر 08:00-10:00ـی بەیانی دەرگای بەڕێوەبەرایەتییەکە بە رووی هاووڵاتیاندا داخرا.

بەو هۆیەوە ژمارەیەکی زۆر هاووڵاتی لە نێو حەوشەی بەڕێوەبەرایەتییەکە کۆبوونەوە و قەرەباڵغییەکی زۆر دروستبوو، دواتر دەرگای راییکردنی مامەڵەکانیان بە روودا کرایەوە.

ماوەی 38 رۆژە مووچەی مووچەخۆرانی هەرێم بەهۆی کێشەی بەغداد و هەولێر دواکەوتووە و هێشتا دیار نییە کەی مووچەی مانگی حەوت دەنێردرێت.

لە 21-07-2024، واتە 28 رۆژ لەمەوبەر وەزارەتی دارایی هەرێم لیستی مووچەی فەرمانبەرانی هەرێمی رادەستی وەزارەتی دارایی عێراق کرد و لە چەند رۆژی رابردوو وردبینی لە لسیتەکەدا تەواو کرا.

بەگوێرەی زانیارییەکانی زوومی بەغداد، لە کۆبوونەوەی هەفتەی رابردووی لیژنەی دارایی پەرلەمانی عێراق لەگەڵ تەیف سامی، وەزیری دارایی عێراق باسی مووچەی هەرێم کراوە و تەیف سامی گوتوویەتی، “ناتوانێت ئیمزا لەسەر لیستەکە بکات بەهۆی ئەوەی هێشتا بەشێک لە داهاتی نانەوتی حکومەتی هەرێم رادەستی بەغداد نەکراوە.”