داهاتی سلێمانی بەراورد بە هەفتەی رابردوو نزیکەی ملیارێک دینار کەمیکردووە

زووم…

ماڵپەڕی شەفافیەت داهاتی هەفتەی رابردووی پارێزگای سلێمانی بڵاوکردەوە و رایگەیاند، کۆی گشتیی داهاتەکە زیاتر لە 16 ملیار دینارە، کە بەراورد بە هەفتەی رابردوو ملیارێک دینار کەمیکردووە.

ماڵپەڕی شەفافیەت، کە تایبەتە بە چاودێریی رێکخستنی داهاتی حکومەتی هەرێمی کوردستان لە پارێزگای سلێمانی، بڵاویکردووەتەوە، لە  06-12ـی تەموزی 2024، داهاتی پارێزگای سلێمانی 16 ملیار و 528 ملیۆن و 38 هەزار و 239 دینار بووە.

بەگوێرەی ماڵپەڕەکە، 78%ـی داهاتەکە نەختینەیی بووە، 5%ـی بە شێوەی چەک و 18%ـەشی بە شێوەی مقاسە بووە.

ئەمە لەکاتێکدایە، هەفتەی رابردوو داهاتی پارێزگای سلێمانی 17  ملیار و 80 ملیۆن و 814 هەزار و 383 دینار بوو.