رۆژنامە عەرەبییەکان
شەرقلئەوسەت
گومان لەسەر رافایڵ گروسى دروست دەکرێت
دواى سەردانەکەى رافاێڵ گروسی، بەڕێوەبەرى گشتیى وزەى ئەتۆم بۆ تاران و کۆبوونەوەى لەگەڵ گەورە بەرپرسان و لایەنە پەیوەندیدارەکانى پیتاندنى یۆرنیۆم لە ئێران، دبلۆماتکارێکى رۆژئاوایی بە رۆیتەرزی راگەیاندووە، “من نازانم گروسی هیچى دەست دەکەوێت یان نە؟ ”
گومانى ئەم دبلۆماتکارە رۆژئاواییە لەوەوە سەرچاوەى گرتووە کە شرۆڤەکاران دەڵێن، گروسی گەشت ناکات بۆ هیچ وڵات و بۆ هیچ مەبەستێک تاوەکو پێشتر دڵنیا نەبێتەوە لە بەدەستهێنانى ئامانجەکەى، رۆیتەرز باسی لەوەش کردووە کە لە لایەن ئێرانییەکانەوە کارئاسانى زۆری بۆکراوە و لە لایەکى دیکەشەوە بەشێکى دیکەیان باوەڕیان وایە گروسی چاوپۆشی لە هەندێک بابەت و شوێن کردووە کە دەبوو بەدواداچوونیان بۆ بکات.
بڕیاریشە تا سەرى مانگى داهاتوو گروسی راپۆرتێک لە بارەى ئێرانەوە ئامادەبکات تاوەکو لە کۆبوونەوە چاوەڕوانکراوەکەى ئەنجومەنى ئاژانسى وزەى ئەتۆم لە ڤییەننا بیخاتەڕوو، بەڵام ئەوەى کە گومانەکانى لەسەر گروسی گەورەتر کردووە دەست گەیشتنى ئێرانە بە رێژەى 60%ـى پیتاندنى یۆرانیۆم.
دەستوور
دوو لیواى هاوبەش لەنێوان هەرێمى کوردستان و ناوەند دروستکرا
تەحسین خەفاجی، سەرۆکی شانەى راگەیاندنى ئەمنى عێراق رایگەیاند، دروستکردنى دوو لیواى هاوبەش لەنێوان هێزە عێراقییەکان و پێشمەرگە لە ئەنجامى تێگەیشتنى وەزارەتى پێشمەرگەو بەرگریی ناوەنددا بووە، بەم نزیکانە یەکەکانیان لەو شوێنانە نیشتەجێ دەکرێن کە جێگەى بایەخى هەردوولان و بەزوترین کات پاسەوانى سنوورەکانیان دەکەوێتە ئەستۆ، خاڵی پشکنینى هاوبەشیش دادەنێن، ئاماژەى بەوەش کردووە کە ئەو دوو لیوایە راهێنانیان دەستپێکردووە و مووچەیان وەرگرتووە و راستەوخۆ لەژێر فەرمانى سەرۆک ئەرکانى سوپاى عێراقدا دەبن.
هاوکات لیوا عەبدولخالق تەڵعەت رایگەیاند، دورستکردنى ئەو دوو لیوا هاوبەشە بۆ پڕکردنەوەى کەلێنە ئەمنییەکانى نێوان هەردوولایە.
سەباح
لە ماوەى چوار مانگى ئەمساڵدا 190 کەس بە تاوانى بازرگانی بە مرۆڤەوە دەستگیرکراون
وەزارەتى ناوخۆی عێراق رایگەیاند، لە سەرەتاى ئەمساڵەوە تائێستا 190 کەس بەتاوانى بازرگانیکردن بە مرۆڤەوە دەستگیرکراون و تەنها لە هەڵمەتەکەى بەتاوینى بەغداددا کە هەفتەى پێشوو بەڕێوەچوو، زیاتر لە 800 کەسی دیکەیان بەتاوانى جۆراوجۆر دەستگیرکراون.
لیوا سەرمەد موسەدیق، لە کۆنفرانسێکى رۆژنامەنووسیدا رایگەیاند، بەهۆی بەهێزى ئەو پلانەى دانراوە بۆ رووبەڕووبوونەوەى بازرگانیکردن بە مرۆڤەوە رێژەکەى زۆر کەمیکردووە.
ئەو دەڵێت، لیژنەیەکى تایبەتیان لە وەزارەتە جۆراوجۆرەکان دروستکردووە و لەنێویاندا وەزارەتى ناوخۆی هەرێمى کوردستانیشی تێدایە.
عەرەبی جەدید
روسیا چەکى ئەتۆمى ناستراتیژ تاقیدەکاتەوە
وەزارەتى بەرگریی روسیا رایگەیاند، بەمنزیکانە چەکى ئەتۆمی ناستراتیژ تاقیدەکەینەوە.
وەزارەتى بەرگری جەختى کردووەتەوە لەبەرئەوەى ئۆکراین بە چەکی بەریتانى هێرشی کردووەتە سەر سوپاى روسیا بە مافى خۆمانى دەزانین هێرش بکەینە سەر هەر دامەزراوە، یان ئۆتۆمبێل و سەربازێکى بەریتانى لەنێو خاکى ئۆکرایندا.
وەزارەتى بەرگریی روسیا وادەى تاقیکردنەوەکەى ئاشکرا نەکردووە و تەنها ئاماژەى بەوە داوە لەنێو پرۆسەی مانۆڕێکى سەربازییدا چەکى نا ستراتیژى ئەتۆمی تاقیدەکەنەوە.
هاوکات دیمیتری بیسکۆڤ، گوتەبێژى سەرۆکایەتی روسیا رایگەیاند، سەرکردە رۆژئاواییەکان باسیان لەوەکردووە خۆیان بۆ رووبەڕووبوونەوەى سوپاى روسیا ئامادەدەکەن.
رۆژنامە فارسییەکان
هەمدلی
نرخی گۆشتی سوور لە تاران بەرزدەبێتەوە؛ لەنێوان 450 بۆ 880 هەزار تومەندایە
لە بازاڕەکانى تاران نرخى گۆشتى سوور بەشێوەیەکى دیار بەرزبووەتەوە، نرخى کیلۆیەک گۆشتى سوور لەنێوان 450 بۆ 880 هەزار تومەندایە.
ئاژانسی هەواڵی مێهر دەڵێت، جیاوازی نرخی گۆشتی مەڕ لە 450 بۆ 880 هەزار تومەن لە دوکانەکانی تاران پێویستى بە چاودێرییە.
رۆژنامەکە نووسیویەتى، لە هەمانکاتدا نرخى مریشک و هێلکە جێگیرە، نرخى بەرهەمە شیرەمەنیەکانیش هیچ گۆڕانکارییەکی بەسەردا نەهاتووە.
جامی جەم
ئیسرائیل بە رێککەوتنی دیپلۆماسی گەمارۆ دەدرێت؛ ئێران و کوردستانى عێراق رێککەوتن دەکەن
رۆژنامەکە نووسیویەتى، کوردستانی عێراق توانای کاریگەری دانانی لەسەر بەرژەوەندییە سیاسی و ئابوورییەکانی زۆرێک لە وڵاتان هەیە، چونکە دەکەوێتە خاڵێکەوە پەیوەندی بە بەرژەوەندییە سیاسی و ئابوورییەکانی زۆرێک لە وڵاتانەوە هەیە.
بۆری نەوت، رێگەی ترانزێتی کاڵاکان، ناوچەی کشتوکاڵی و مامەڵە ئابووریەکان کە لە رۆژهەڵاتەوە بۆ رۆژئاوا یان لە باکوورەوە بۆ باشوور ئەنجام دەدرێن، بە کوردستانی عێراقدا تێدەپەڕێت و لەم روانگەیەشەوە دەستخستنی سامانی نەوت یەکێکە لە ئامانجە ستراتیژییەکانی ئیسرائیل لە کوردستاندا، چونکە بەشێکی سەرەکیی یەدەگی نەوتی عێراق لە ناوچەکانی کەرکوک و سلێمانیە و هەبوونی ئیسرائیل لە کوردستانی عێراق دەتوانێت یارمەتیدەرێکی زۆر بێت بۆ دابینکردنی ئەو نەوتەی ئیسرائیل پێویستی پێیەتی.
بەگوێرەی راپۆرتی فاینانشیاڵ تایمز، 75٪ی هاوردەی نەوتی ئیسرائیل لە کوردستانی عێراقەوەیە.
رۆژنامەکە نووسیویەتى، ئەو رێککەوتنەی لەنێوان کۆماری ئیسلامی ئێران و هەرێمی کوردستان کراوە دەتوانێت یارمەتیدەر بێت لە بڕینی خوێنبەرە ئابوورییەکانی ئیسرائیل. خاوەندارێتی هەرێمی کوردستان لە گەورەترین یەدەگی گۆگردی جیهان، سەرچاوەیەکی دیکەی ئەم هەرێمەیە کە ئێران دەبێت سوودی لێ وەرگرێت.
ئەبرار
نەبوونی حیجاب دەبێتە هۆی سزادانی دەرمانخانەکان
سەرۆکی رێکخراوی خۆراک و دەرمان رایگەیاند، پابەندبوون بە یاسای حیجاب یەکێکە لە بابەتەکان کە رۆڵی هەیە لە پشکی دەرمان بۆ دەرمانخانەکان.
رێکخراوی خۆراک و دەرمان سەبارەت بە مامەڵەکردن لەگەڵ دۆخی حیجاب له دەرمانخانەکان گوتی، رێکخراوی خۆراک و دەرمان یەکێک بوو لەو یەکەم شوێنانەی کە هاتە نێو بابەتی پابەندبوون بە حیجاب و هەرچەندە یاسای توندی حیجاب لە دەرمانخانەکاندا جێبەجێ کراوە، بەڵام لەم بابەتەدا هێشتاش سەرپێچی هەیە.
ئەگەر دەرمانخانەیەک پابەند نەبێت، لە پلەی یەکەمدا ئاگادار دەکرێتەوە، ئەگەر هۆشدارییەکە کاریگەری لەسەر رێگرییەکان نەبوو تاوانباران رەوانەی دەسەڵاتدارانی مەحکەمە دەکرێن.
سایە
لافاو زیانی 10 ملیۆن دۆلاری بە ژێرخانی ناوچە کۆچەرییەکان گەیاندووە
سەرۆکی رێکخراوی کاروباری کۆچەریی ئێران رایگەیاند، بڕی زیانەکانی باران و لافاو بە ژێرخانی ناوچە کۆچەرییەکان لە سەرەتای ئەمساڵەوە زیاتر لە 500 ملیار تومەنە و گوتیشی، لافاوەکان تائێستا هیچ زیانێکی گیانیان بە کۆمەڵگەی کۆچەریی ئەو وڵاتە نەگەیاندووە.
بەگوێرەی راپۆرتی وەزارەتی جیهادی کشتوکاڵ، بە پێکهێنانی بارەگای بەڕێوەبردنی قەیران بۆ کۆچەرییەکان، هۆزەکان بە شێوازی جیاواز لە هۆشدارییەکانی کەشناسی ئاگادارکرانەوە و ئەمە هەنگاوێکی گرنگ بوو کە تائێستاش هیچ راپۆرتێکمان پێنەگەیشتووە لەبارەی زیانی گیانی و لەدەستدانی ژیانی کۆچەرییەکان و زیانەکان تەنها ماددی بووە.
رۆژنامە تورکییەکان
سۆزجو
لە هەڵبژاردنى شارەوانییەکاندا رێژەى بەشداریی 80% بووە
دەستەى باڵاى هەڵبژاردن لە تورکیا ئەنجامە فەرمییەکانى هەڵبژاردنى رابردووى رایگەیاند، لە هەڵبژاردنى شارەوانییەکانى 31ـى ئازار رێژەى بەشدارى لە تورکیا و لە باکوورى کوردستان زیاتر لە 80% بووە.
ئەحمەد یەنەر، سەرۆکى دەستەى باڵاى هەڵبژاردن رایگەیاند، زۆرترین رێژەى بەشداری لەسەر ئاستی پارێزگاکان بۆ گەورەشارەوانییەکان پارێزگاى مەنیسا بووە بە رێژەى سەدا 84.97. هەروەها کەمترین رێژەی بەشداربوو لە ئامەد بووە بە رێژەى سەدا 67.34
یەنیچاغ
لە سێ شارۆچکە و چوار شارەوانی هەڵبژاردن دووبارە دەکرێتەوە
ئەحمەد یەنەر، سەرۆکی دەستەى باڵاى هەڵبژاردن لە تورکیا رایگەیاند: لە پاش وەرگرتنی تانەکان لە پارتە سیاسییەکان لەبارەى ئەنجامەکانى هەڵبژاردنى شارەوانییەکانى 31ـى ئازار، لە دووى حوزەیران هەڵبژاردن لە سێ شارۆچکە و چوار شارەوانی پارێزگاکان دووبارە دەکرێتەوە.
حورییەت
دۆنەرى تورکی بە سیاسیی کراوە
دۆنەرى تورکی لە ئەوروپا بووەتە رۆژەڤى سیاسییەکان، پارتى چەپ لە ئەڵمانیا گرانی نرخی دۆنەرى تورکی کردووەتە رۆژەڤ، یۆنان نیگەرانە لەوەى دۆنەرى تورکی لە بازاڕەکانى ئەوروپا رەواجی زۆرە و تانەى لەوەشگرتووە کە دۆنەر بە براندێکى تورکی ناسراوە.
ساڵانە بە بەهاى سێ ملیار و نیو یۆرۆ دۆنەرى تورکی بە وڵاتانى ئەوروپا دەفرۆشرێت.
ئەکشام
فڕۆکەى نیشتیمانیی لە برەوداندایە
دوێنى فڕۆکەى نیشتیمانیی لە جۆرى (کان) بە یاوەرى فڕۆکەى ئێف 16 بۆ جارى دووەم تاقیکرایەوە، یەکەم جار لە 21 ی شوباتدا بە بەرزی هەشت هەزار پێوە فڕی، لە تاقیکردنەوەکەدا 10 هەزار پێ بۆ ماوەى 14 دەقە بە ئاسمانەوە مایەوە.
رۆژنامە ئینگلیزییەکان
دەیلی تەلەگراف
لە هەر پەنجا تاوان لە جیهاندا سەرچاوەی یەکێکیان فەیسبوک و ئینستاگرامە
ناوەندێکی کۆکردنەوەی زانیاری دەڵێت، لە هەر پەنجا تاوان لە جیهاندا ئەنجام دەدرێن، سەرچاوەی ئەنجامدانی یەکیان فەیسبوک یان ئینستاگرامە. ناوەندەکە هۆشداری داوە و داوادەکات رێوشێنی زیاتر بگیردرێتەبەر.
رێژەی لەسەدا چلی ئەو تاوانانەی لەنێو بەریتانیا و وێڵزدا ئەنجامدراون سەرچاوەکەیان گەڕاوەتەوە سەر بوونی هەژماری هەڵخەڵەتاندن بەناوی نهێنییەوە لەنێو فەیسبوکدا. ناوەندەکانی بازاڕکردن لەسەر فەیسبوک بەتایبەتی بوون بە سەرچاوەی هەڵخەڵەتاندنی خەڵک.
گاردیەن
سەرباری فشارەکان بۆ گەیشتن بە ئاگربەست ئیسرائیل هێرشە ئاسمانییەکانی بۆسەر رەفەح دەستپێکرد
مەترسی لەسەر چارەنووسی ناوچەی رەفەح دروستبووە و کەوتووەتە بەر سەنگی مەحەک. پاش ئەوەی شەوی رابردوو حەماس رایگەیاند، ئاگربەستی ئاڵوگۆڕپێکردنی بارمتەکانی پەسەندکردووە، گومانەکانی ئیسرائیل نەڕەوینەوە، بۆیە چەند هێرشێکی ئاسمانی کردە سەر ناوچەکانی بەری باشووری شارەکە. ئەو ناوچەیەى بۆردومانى کرد، نزیکەی یەک ملیۆن کەسی تێدا نیشتەجێن.
دەیلی ئێکسپرێس
بەریتانیا لەبەردەم بەرزبوونەوەى نرخى خانوبەرەدایە
بەریتانیا کەوتووەتە بەر ئەگەری ئەوەی جارێکی دیکە نرخی خانووبەرە بەرزببێتەوە. شارەزایان وای بۆ دەچن لە چوار ساڵی داهاتوودا نرخەکان بەڕێژەی لەسەدا بیست هەڵبکشێن، بۆیە دەڵێن لەوانەیە تاوەکو ساڵی 2028 نرخی خانوویەک بگات بە 346 هەزار پاوەن.
واشنتن پۆست
پوتین گەلەکەی خۆی کردووە بە سەرباز
رۆژنامەکە نووسیویەتى، لە کاتێکدا ڤلادیمێر پوتین بەردەوامە لە درێژەدان بە هەڵمەتی داگیرکردنی ئۆکراین، ئەو لەناوخۆی وڵاتەکەشیدا هەڵمەتێکی دەستپێکردووە، کە هەموو گەل و خەڵکەکەی خۆی بکات بە سەرباز، دەیەوێت هەموو خەڵکی وڵاتەکەی خۆی وڵاتانی رۆژئاوا وەک دوژمنی سەرسەختی خۆیان ببینن.
ئەمڕۆ سێشەممە پوتین بۆ جاری سێیەم پۆستی سەرۆکایەتی وەردەگرێتەوە، ئەمە تەنها مانای ئەوە نادات، کە ئەو کەسە 25 ساڵ لە دەستەڵات بەردەوام دەبێت، بەڵکو مانای ئەوەشە دەیەوێت روسیا بکات بە هێزێکی سەربازی، نەک هەر پشتیوانی لە کرملین بکات، بەڵکو سیستمی جیهانیش هەڵبوەشێنێتەوە.
