رۆژنامە عەرەبییەکان
شەرق ئەوسەت
بە چوونەناوەوەی یۆنان بۆ ناو هاوپەیمانێتییەکە، مەودای کردە و هێرشەکانی ئەوروپا لە ناو دەریای سووردا فراوانتر دەبێتەوە
گوتەبێژی فەرمیی حکومەتی یۆنان رایگەیاند، وڵاتەکەی رەزامەندی دەربڕیوە بەشداریی ئەرکە دەریاییەکەی یەکێتیی ئەوروپا لەناو دەریای سووردا بکات. ئەو هێزانە کار لەسەر پاراستنی کەشتییە بازرگانییەکان دەکەن لەو هێرشانەی حوسییەکان ئەنجامیان دەدەن.
بافلۆس ماریناکیس لە راگەیەنراوێکدا گوتی، نیکۆس دیندیاسی، وەزیری بەرگری پێشنیازیکردووە یۆنان بەشداری بکات لە هێزەکانی پاراستنی کەشتییەکانی ناو دەریای سوور و ئەنجومەنی ئاسایشی وڵاتەکەش رەزامەندیی دەربڕیوە. حکومەت هۆکاری رەزامەندییەکەی گەڕاندووەتەوە بۆ ئەوەی حوسییەکان لە بەندەری پیریۆسدا زیانی زۆریان لە کەشتییەکانی یۆنانیش داوە، تەنانەت هەندێک کەشتیی بارهەڵگریش بەهۆی پەلاماری حوسییەکانەوە بە یەکجاری پەکیان کەوتووە.
سەباح
گرانبوونی نرخی گۆشت وایکردووە حکومەت چەند هەڵمەتێک بۆ چاودێریکردنی نرخەکان ئەنجام بدات
بەرزبوونەوەی نرخی گۆشت لایەنە پەیوەندیدارەکانی ناچار کردووە هەندێک رێوشوێنی بەپەلە بگرنەبەر و وابکەن لە مانگی رەمەزاندا نرخی گۆشت و کەرەستە خۆراکییەکانی تر بەرز نەبنەوە.
نرخی کیلۆیەک گۆشت لە ئێستادا لە نێوانی 23 بۆ 25 هەزار دیناردایە. لەم چەند رۆژەی دواییدا بەرزبوونەوەی زۆری بەخۆیەوە بینیوە، ئەمەش وەزارەتی کشتوکاڵی ناچارکردوە دەرگای هاوردەکردن بکاتەوە.
میقداد موسەوی، گوتەبێژی وەزارەتی ناوخۆی عێراق دەڵێت، وەزارەتەکەیان لە مانگی رەمەزاندا رێوشوێنەکانی چاودێریکردنی نرخ تووندتر دەکاتەوە.
زەمان
تورکیا رێگە دەداتەوە نەوتەکەی هەرێمی کوردستان لە ڕێگەی جیهانەوە بفرۆشرێت و ئەردۆغانیش کاتی سەردانکردنی بەغداد رادەگەینێت.
ئەندامێکی ئەنجومەنی نەوت و گاز لە پەرلەمانی عێراق گوتویەتی، تورکیا بە نوسراو رازیبوونی خۆیی لەبارەی هەناردەکردنی نەوتی هەرێمەوە داوە بە عێراق، بەڵام حکومەت لەئاستی راگەیاندندا باسی نەکردووە، بەڵام کێشەکانی بەردەم هەناردەکردنی نەوتی هەرێم چارەسەرکراون.
رەجەب تەیب ئەردۆغان، سەرۆککۆماری تورکیا رایگەیاند نیازای وایە لە کۆتایی مانگی ئازاری داهاتوودا سەردانی عێراق بکات و ئەو سەردانەی دەکەوێتە پاش رۆژی ئەنجامدانی هەڵبژاردنەکانی شارەوانیەکانی تورکیاوە کە بڕیارە لە دواین رۆژانی مانگی ئازاری داهاتوودا ئەنجام بدرێت.
عەرەب
قەتەر نیگەرانە لەوەی دۆسیەی حەماس لەدەست دەرچوە و کۆنترۆڵ ناکرێت
شێخ تەمیم ئال سانی دیدارێکی لەگەڵ ئیسماعیل هەنیەی سەرۆکی دەستەی مەکتەبی سیاسیی حەماسدا هەبووە، لەو دیدارەدا گفتوگۆیان لەبارەی رێککەوتنێکەوە کردووە بۆئەوەی بە خێرایی و هەمیشەیی شەڕ و ئاڵۆزییەکانی غەزە رابگیرێت. لە کاتی ئەم دیدارەدا چەند سەرکردەیەکی مۆسادیش هەر لە قەتەرن. بۆیە پێدەچێت ئەم دیدارە زۆر دۆستانە نەبێت بەڵکو دیداری فشار بێت، قەتەر دەیەوێت فشار بخاتە سەر حەماس هەندێک ئاسانکاری بکات بۆئەوەی بتوانن بگەن بە ئاگربەستێک کە ئیسرائیلیش بتوانێت پەسەندی بکات.
رۆژنامە ئینگلیزییەکان
دەیلی تەلەگراف
بەریتانیا لە رێژەی زیندوومانەوەی نەخۆشانی شێرپەنجە 15 ساڵ لەدواوەیە
بەریتانیا لەڕووی زیندوومانەوەی نەخۆشانی شێرپەنجە بەراورد بە وڵاتە گەورەکانی دیکەی جیهان 15 ساڵ لەدواوەیە چونکە بەگوێرەی توێژینەوەیەک، وڵاتەکە کێشەی چارەسەری کیمیایی و تیشکی هەیە. شارەزایانی زانکۆی لەندەن بۆ یەکەمجار لە جیاوازیی چارەسەرکردنی جۆرە جیاوازەکانی نەخۆشی شێرپەنجەیان لە سێ وڵاتدا کۆڵییەوە. لە لێکۆڵینەوەکەدا بۆیان دەرکەوت نەخۆشانی بەریتانیا زۆر دووربوون لەوەی بتوانن چارەسەری کیمایی و تیشک وەربگرن بەرارورد بە وڵاتانی دیکە. تەنانەت ئەوانەشی کە وەریانگرت دەبوو زۆر چاوەڕێ بکەن لەکاتێکدا نەخۆشییەکە لە بڵاوبوونەوە بە جەستەیاندا بەردەوامبوو.
فاینەنشیەڵ تایمز
سوید دوا کۆسپی بەردەمی لابرد بۆ بەئەندامبوونی ناتۆ لەکاتێکدا شەڕی پوتین خەریکە سنوورەکانی هاوپەیمانێتییەکە دەگۆڕێت
سوید بەسەر دوا کۆسپی لەبەردەم داواکەیدا بۆ بەئەندامبوون لە هاوپەیمانێتی ناتۆ زاڵبوو، ئەمەش لەکاتێکدایە کە شەڕی روسیا لە ئۆکراین خەریکە دووبارە نەخشە جوگرافییەکان دادەڕێژێتەوە. پەرلەمانی هەنگاریا شەوی رابردوو دواکەی ستۆکهۆڵمیان پەسەند کرد و سوید بوو بە 32ـەمین ئەندامی ناتۆ ، بڕیارەکەش لەزووترین کاتدا و لە رۆژی هەینییەوە بە فەرمیی دەکرێت و دەچێتە بواری جێبەجێکردنەوە. بە ئەندامبوونی سوید و فینلاند، دەبن بە گەورەترین گۆڕانکاریی لە سنوورەکانی ناتۆدا لەگەڵ روسیا کە دەرهاویشتەی ئەو داگیرکارییەیە کە مۆسکۆ دوو ساڵە لە ئۆکراین دەستیپێکردووە.
واشنتن پۆست
بەرپرسانی ئیسرائیلی دەڵێن یەحیا سینوار لەناو بارمتە ئیسرائیلییەکاندا خۆی شاردووەتەوە
بەرپرسانی باڵای سەربازیی ئسیرائیل دڵنیایی تەواویان هەیە کە یەحیا سینوار، سەرۆکی حەماس لە غەزە و ئەندازیاریی هێرشەکەی 7ی ئۆکتۆبەر لە نێو ئەو تۆڕە تونێڵەی ژێر باشووری غەزەدا خۆی شاردووەتەوە کە بارمتەکانی ئیسرائیلی تێدا شاردراوەتەوە. بەڵام بارمتەکان وەک قەڵغانی مرۆیی بەدەوری ئەودا بەکارهێنراون بۆ پووچەڵکردنەوەی هەر ئۆپەراسیۆنێکی ئسیرائیل بۆ کوشتنی یان دەستگیرکردنی، ئەمەش بووە بە مایەی بێزاریی بۆ ئیسرائیل بۆ ئەوەی کۆتایی بە حەماس و ئەو شەڕە بهێنن کە نزیکەی پێنج مانگە دەستیپێکردووە.
ئۆرشەلیم پۆست
حەماس سیم کارتی ئیسرائیلییان بەکارهێناوە بۆ ئەنجامدانی هێرشەکان
دەیان بۆ سەدان ئەندامی حەماس سیم کارتی ئیسرائیلییان چالاکردووە و لە بەرەبەیانی 7ی ئۆکتۆبەردا بەکاریان هێناوە. بەگوێرەی ئاژانسی هەواڵگریی ئیسرائیل، دەکرێت ئەمە ئاماژەیەک بووبێت بۆ هەوڵی داگیرکاریی وڵاتەکە بەڵام لەهەمان کاتدا حەماس نەیوێراوە ئەو کارە بکات چونکە تەکنەلۆجیای ئیسرائیل پێشتر ئاگاداکردنەوەی دەنارد و هەر داگیرکارێک ئەو هەوڵەی بدایە، لەلایەن هێزە ئاسمانییەکانی وڵاتەکەوە دەکوژران.
رۆژنامە فارسییەکان
ئەبرار
ئاوی رۆشتوو بۆناو دەریاچەی ورمێ سێ هێندەی ساڵی پار زیادیکردووە
بەهۆی بارانبارینی ئەمساڵەوە تا ئێستا و بە بەراورد بە ساڵی رابردوو، ئاوی دەریاچەی ورمێ بە رێژەی 28% زیادیکردووە، هەروەها بەردانەوەی ئاوی بەنداوەکانی مهاباد، بۆکان و ساروق بە 10 ملیۆن مەتر سێجا لەم مانگەوە دەستیپێکردووە کە دەڕژێنە ناو دەریاچەکە.
ئەفکار
بەرهەمهێنانی ساڵانەی ئۆتۆمبێل گەیشتە ملیۆنێک و 230 هەزار دانە
بەرپرسی فەرمانگەی پیشەسازییەکانی ئۆتۆمبێل لە وەزارەتی پیشەسازی و
کانگا و بازرگانیی ئێران گەشەی 61%ی بەرهەمهێنانی ئۆتۆمبێلی لە کەرتی تایبەتدا لە ماوەی ئەمساڵدا راگەیاند.
مێهرداد خوسرەوی گوتیشی، لە سەرەتای ئەمساڵەوە زیاتر لە یەک ملیۆن و 230 هەزار ئۆتۆمبێل لە ئێران بەرهەم هاتووە کە دەکرێ بڵێین پلانەکان هاتوونەتە دی
بۆ پەرەپێدانی بواری بەرهەمهێنان و رێکخستنی بازاڕی ئۆتۆمبێل، بەجۆرێک کە ئێستا رەوتی بەرهەمهێنان و دابینکردنی ئۆتۆمبێلی وڵاتەکەمان لە دۆخێکی باشدایە.
ئیمروز
حکومەتی ئێران: پچڕانی کارەبا و غازمان لە وەرزی زستان نەبووە
گوتەبێژی حکومەت تیشکی خستە سەر ئەوەی پچڕانی کارەبا و غازمان لە زستانی ئەمساڵدا نەبووە، هەرچەندە رێژەی بەکارهێنانیش بەهۆی سەرماوە زیاتر بووە.
عەلی بەهادۆری جەهرۆمی باسی لە دەستپێشخەرییەکانی حکومەت کرد و جەختی لە رۆڵی خەڵک کردەوە لە گەیشتن بە دەستکەوتە گرنگەکان.
ناوبراو گوتیشی، پەرەپێدانی کێڵگەی غازی پارسی باشووری و بەرزکردنەوەی بەرهەمهێنانی غاز و دڵنیابوون لە هەڵگرتنی غاز بۆ کاتی بەرزبوونەوەی خواست کاری بۆ کراوە و سەرەڕای ئەوەش، هەوڵمان داوە بۆ هەمەچەشنکردنی وزە و چالاکییە ئابوورییەکان لە دەرەوەی فرۆشتنی نەوت، لەوانەش چالاککردنی پیشەسازییەکانی پترۆکیمیایی.
کەیهان
زنجیرە درامای “سەنجەر خان” لەلایەن کوردەکانەوە پێشوازی لێکرا
حسێن جەلالی، بەرهەمهێنەری زنجیرەی “سەنجەر خان” لە چاوپێکەوتنێکدا لەگەڵ تەسنیم گوتی: پێشوازی لە زنجیرەکەمان زیاتر بوو لەوەی چاوەڕوان دەکرا، پێم وایە لانیکەم 90% رێژەی خەڵکی کوردستان سەیری ئەم زنجیرەیە دەکەن. ئێمە فیدباکمان لە خەڵکی پارێزگا جیاوازەکان و هەروەها کوردستانی عێراق و وڵاتانی ئەوروپا و تەنانەت ئەمریکاوە پێگەیشتووە.
ناوبراو دەشڵێت، 100 ساڵ لەمەوبەر شتێک روویداوە و کەسێک بە ناوی سەنجەر خان لە کوردستانەوە دێت و دژی ستەم دەوستێت. بەداخەوە هیچ کاتێک کارەکتەری سەنجار خان لە میدیاکاندا نوێنەرایەتی نەکراوە و نەگێڕایەوە. ئامانجمان ئەوە بوو کە بتوانین سەنجەر خان بۆ خەڵکی خۆمان و دەرەوەی وڵات وەک پاڵەوانێکی نیشتمانی بناسێنین.
رۆژنامە تورکییەکان
سۆزجو
خەرجی 40 چرکەى کۆشکی کۆماریی یەکسانە بە موچەى مانگێکى خانەنشینێک
لە رۆژێکدا 33.6 ملیۆن لیرە خەرجی کۆشکی کۆماریی سەرۆککۆمار رەجەب تەیب ئەردۆغانە، ئەم خەرجییە زەبەلاحەى کۆشکی کۆمار بۆ 40 چرکە دەکاتە موچەى خانەنشینێک لە تورکیا.
میللیەت
جەهەپە دەربارەى سندوقەکانی دەنگدان هۆشداری دەدات
جەهەپە لە چوارچێوەى ئامادەکارییەکانى بۆ هەڵبژاردنى شارەوانییەکانی تورکیا و باکوورى کوردستان، بە مەبەستى پارێزگاریکردن لە سندوقەکانی دەنگدان، 400 هەزار کەسى وەک چاودێر بۆ سەر سندوقەکان دەستنیشان کردووە.
هەروەها ناوى ئەو چاودێرانەشی سڕیوەتەوە کە لە هەڵبژاردنى رابردوودا نەچوبوون بۆ سەر ئەرکەکانیان.
ئەکشام
سوید بوو بە 32مین ئەندامى ناتۆ
لەدوای هەنگاوە ئەرێنییەکەى تورکیا بۆ ئەندامبوونى سوید لە ناتۆ، پەرلەمانی هەنگاریا دەنگى بە ئەندامبوونى سوید لە ناتۆ دا. لە پەرلەمانى هەنگاریا شەش ئەندام بە نەخێر و 188 ئەندامی دیکە بە بەڵێ دەنگیان دا.
یەنى بیرلیک
ئەردۆغان: ئامانجمان کڕینى فڕۆکەى ئێف 16ـیە
رەجەب تەیب ئەردۆغان، سەرۆککۆمارى تورکیا رایگەیاند، لەئێستا ئامانجمان کڕینى ئێف 16ـیە نەوەک ئێف 35، سەرجەم گفتوگۆکانیشیمان لەگەڵ کۆنگرێس و سیناتۆرەکان لەسەر هەنگاوەکانى کڕینى ئێف 16 بووە لە ئەمریکا.
