قوباد تاڵەبانی: گەشبینین ئەمساڵ کێشە داراییەکانی نێوان هەرێم و بەغداد چارەسەربکەین

زووم:

قوباد تاڵەبانی، جێگری سەرۆکوەزیرانی هەرێمی کوردستان گەشبینە لەمساڵدا کێشە داراییەکانی نێوان هەرێم و بەغداد بە یەکجاری چارەسەر بکرێن.

ئەمڕۆ چوارشەممە قوباد تاڵەبانی پێشوازی لە شاندێکی ئاژانسی گەشەپێدانی فەرەنسی کرد، قسەیان لەبارەی دۆخی ئابووریی هەرێمی کوردستان و چۆنیەتی بەهێزکردنی کەرتی تایبەت کرد.

بەگوێرەی راگەیەندراوی نووسینگەی جێگری سەرۆکوەزیران، قوباد تاڵەبانی لە کۆبوونەوەکەدا گوتوویەتی، هەوڵەکان بۆ چارەسەرکردنی کێشە داراییەکانی نێوان هەرێم و بەغداد بەردەوامە و گەشبینین لە ئەمساڵدا بە یەکجاری ئەم کێشەیە چارەسەر بکرێت.

ئەمە لەکاتێکدایە، هەوڵ و گفتوگۆکانى حکومەتى هەرێمى کوردستان و عێراق بەردەوامە بۆ چارەسەرى کێشە داراییەکانى نێوان هەولێر و بەغداد، بۆ ئەوەش هەوڵى هەموارکردنەوەى یاساى بودجەى گشتى دەدەن.