فوئاد حسێن وەزیرى دەرەوەى عێراق رایگەیاند، لێکۆڵینەوە لە کوژرانى هاوڵاتییە ئەمریکییەکە بەردەوامە کە هەفتەى رابردوو لە بەغداد کوژرا.
فوئاد حسێن، کە هاوکات جێگرى سەرۆکوەزیرانى عێراقە، لە میانى پێشوازى لە ئەلینا رۆمانسکى باڵیۆزى ئەمریکا لە عێراق رایگەیاند، هەوڵەکان بۆ ئاشکراکردنى تاوانبارانى کوشتنى هاوڵاتییە ئەمریکییەکە و رادەستکردنیان بە دادگا بەردەوامە .
فوئاد حسێن ئەوەشى بە باڵیۆزى ئەمریکا لە عێراق گوتووە، هەر کاتێک لێکۆڵینەوەکان گەیشتە ئەنجامى کۆتایی ئەوکاتە رادەگەیەنرێت.
شەوى دووشەممەى هەفتەى رابردوو 7ى تشرینى دووەمى 2022 لەناوەڕاستى بەغداد، هاوڵاتییەکى ئەمریکى بەناوى ستیڤن ترۆڵمان دەستڕێژى گولـلەى لێکرا و کوژرا، تائێستاش هیچ کەسێک لەسەر رووداوەکە دەستگیرنەکراوە.
رۆژێک دواتر، گروپێکی چەکدار بەناوى “هاوەڵانی ئەشکەوت” بەرپرسیارێتیی کوشتنی هاوڵاتییە ئەمریکییەکەیان لە ئەستۆ گرت و لە راگەیەنراوێکدا گوتیان، کوشتنی ئەو هاوڵاتییە ئەمریکییە لە تۆڵەی کوشتنی قاسم سولەیمانی و ئەبو مەهدی موهەندیسدا بووە.
