زووم..

لەبارەى هێرشە درۆنییەکەی ئەمڕۆی بەغداد، حکومەتی عێراق هاوپەیمانیی نێودەوڵەتی بە بەرپرسیار دەزانێت و دەڵێت، ئەو کارە دەبێتەهۆی تێکدانی هەموو لێکتێگەیشتنەکان.

گوتەبێژێک بەناوی فەرماندەیی گشتیی هێزە چەکدارەکانی عێراق لە راگەیەنراوێکدا دەڵێت، لە دەستدرێژییەکی ئاشکرا و پێشێلکردنێکی روونی سەروەری و ئاسایشی عێراقدا، فڕۆکەیەکی بێفڕۆکەوان لە هێرشێکدا کە هیچ جیاوازی نەبوو لە کردەوە تیرۆریستییەکان، بارەگایەکی ئەمنی لە بەغدادی پایتەخت کردە ئامانج.

دەشڵێت، هێرشەکە قوربانی لێکەوتەوە و ئەو کارەش بە هەموو شێوەیەک رەتدەکەنەوە.

ئاماژەی بەوەشکردووە، حکومەتی عێراق هاوپەیمانیی نێودەوڵەتی بە بەرپرسیار دەزانێت لەو هێرشە بێ بیانووە بۆسەر لایەنێکی ئەمنیی عێراقی کە بەگوێرەی یاسا و رێساکان کاریکردووە.

هۆشداریشی داوە کە ئەو کارە هەموو لێکتێگەیشتنەکانی نێوان هێزە چەکدارەکانی عێراق و هاوپەیمانیی نێودەوڵەتی تێک دەدات.

دەشڵێت، هێرشەکە پێشهاتێکی مەترسیدارە و دەستدرێژییە بۆسەر عێراق و دوورە لەو ئەرکەی هاوپەیمانیی نێودەوڵەتی لەپێناویدا دروست بووە.

ئەمە لە کاتێکدایە بەیانی ئەمڕۆ لە ناوەڕاستی بەغداد بۆردومانی بارەگای لیوای 12ی حەشدی شەعبی لە شەقامی  فەلەستین لە بەغداد کرا و بەهۆیەوە ئەبوتەقی، جێگری فەرماندەیی ئۆپراسیۆنەکانی پشتێنی بەغداد کە سەر بە حەشدی شەعبییە کوژرا