زووم:
شۆفێرانى بارهەڵگر لە دەروازەى نێودەوڵەتى پەروێزخان دژى بڕیارێکى کۆمارى ئیسلامى ئێران ماوەى سێ رۆژە مانگرتنیان راگەیاندووە و رێگەى سەرەکى دەروازەکەیان داخستووە.
عوسمان محەمەد، نوێنەرى بارهەڵگرەکانى پەروێزخان بە زوومى گوت، ئێران مەرجى ئەوەیە نابێت کە دێنە ناوخۆى ئێرانەوە تانکى بارهەڵگرەکانیان پڕبێت.
گوتیشى، دەبێت بە 100 لیترەوە بچنە ناوخۆى ئێرانەوە و ناچارن لانیکەم 600 لیتر گاز لەو وڵاتە بکڕن، بە پێچەوە سزاى مادى دەدرێن کە دەگاتە نزیکەى 300 هەزار دینار.
راشیگەیاند، لە ئێران هەر لیترێک گازیان بە 500 دینار پێدەفرۆشێت، ئەوەش بۆ ئەوان نرخێکى زۆرە.
هاوکات هەورامان ئەحمەد، گوتەبێژى مەرزەکە بە زوومى راگەیاند، ئەمڕۆ سەرپەرشتیاری مەرزی نێودەوڵەتى پەروێزخان لەگەڵ لایەنى ئێرانى کۆدەبێتەوە بۆ چارەسەرکردنى کێشەکە، بە گوتەى ئەو هەر رۆژێك داخستنی مەرزەکە، یەك ملیار دینار زیانی هەیە.
