35
وەزارەتی تەندروستی فەلەستین ئاشکرایکرد، ژمارەی کوژراوانی بۆردومانی ئیسرائیل بۆ سەر کەرتی غەزە بۆ 11078 کەس بەرزبۆتەوە.
ئەشرەف قودرە گوتەبێژی وەزارەتەکە دەڵێت:” ژمارەی کوژراوانی ھێرشی سی و پێنج رۆژەی ئیسرائیل بۆ سەر کەرتی غەزە بۆ 11078 کەس بەرزبۆتەوە، کە لەو ژمارەیە 4506 یان منداڵن و 3027ی ژنن و 678یش کەسانی بەتەمەنن، ھاوکات 27 ھەزار و 490 ھاوڵاتی سڤیل بریندار بوون”.
قودرە دەشڵێت:” تاوەکو ئێستا لە بێسەرو شوێن بوونی 2700 کەس ئاگادار کراوینەتەوە لەنێویاندا 1500 منداڵ هەیە”.
ئیسرائیل ماوەی زیاتر لە مانگێکە بە خەستی غەزە بۆردومان دەکات لە کاردانەوەی ئەو ھێرشەی چەکدارانی حەماس لە ٧ی ئۆکتۆبەری رابردوو کردیانە سەر ئیسرائیل.
