زووم:
ڕۆژی هەینی حکومەتی بزووتنەوەی حەماس رایگەیاند، دەروازەی چوونە ژوورەوەی نەخۆشخانەی شیفا لە غەزە لەلایەن ئیسرائیلەوە بۆردومانکراوە، هاوکات وەزارەتی تەندروستی لە کەرتی غەزە پشتڕاستیکردەوە، ژمارەیەک هاووڵاتی کوژراون و دەیان کەسیش برینداربوون.
نووسینگەی ڕاگەیاندنی حکوومەتی بزووتنەوەی حەماس ڕایگەیاند، سوپای ئیسرائیل بە مووشەک کاروانێکی ئامبوڵانسی کردووەتە ئامانج، کە خەڵکی برینداریان هەڵگرتبوو، پێش ئەوەی بەرەو دەروازەی ڕەفەح لە باشوور بڕۆن.
وەزارەتی تەندروستی لە غەزە راشیگەیاند، لە ئەنجامی بۆردومانەکەی ئیسرائیل بۆ سەر دەروازەی نەخۆشخانەی پزیشکی شیفا لە غەزە ژمارەیەک هاووڵاتی کوژراون و دەیان کەسی دیکەش برینداربوون، بەبێ ئەوەی زانیاری زیاتر لەو بارەوە بخاتەڕوو.
هاوکات شایەتحاڵێک بە ئاژانسی فرانس پرێسی ڕاگەیاندووە، لە نەخۆشخانەکەدا پێنج تەرمم بینیوە، کە دەگوازانەوە بۆ مردووخانەکە.
هەروەها بە گوتەی شایەتحاڵان، بۆردومانەکە لە شەقامی ئەلڕەشید ڕوویداو،ە کە باکوور و باشووری کەرتی غەزە بەیەکەوە دەبەستێتەوە.
لە گرتەیەکی ڤیدیۆییدا، کە لە سۆشیال میدیادا بڵاوبووەتەوە، “پشتراستکراوە نییە”، نزیکەی دە تەرم لە سەر زەوی کەوتوون و هەموو جەستەیان خوێنە.
لای خۆیەوە سوپای ئیسرائیل ڕایگەیاند، ڕاپۆرتێکی وەزارەتی تەندروستی لە کەرتی غەزە پشتڕاستدەکەنەوە، کە تیایدا ئاماژە بەوە کراوە، دەیان فەلەستینی لە هێرشێکی ئیسرائیل بۆ سەر کاروانێکی ئەمبولانس کوژراون و برینداربوون.
