زووم، ئاژانسەکان
ئەمڕۆ سێشەممە، پاسەوانی کەناراوەکانی یۆنان رایگەیاند، بەلەمێکی کۆچبەران لە نزیک دورگەی فارماکۆنیسی کەناراوەکانی تورکیا لە ناو دەریای ئیجەدا ژێرئاوکەوت، بەهۆیەوە کۆچبەرێک گیانی لەدەستداوە و 14ی دیکەش رزگارکراون.
بەگوێرەی بەرپرسانی یۆنان، ئەوانەی کە رزگاریان بووە شەش ژن، سێ منداڵ و پێنج پیاو بوون و لە تورکیاوە بەمەبەستی کۆچکردن بە دەریای ئیجەدا بەڕێکەوتوون. سەرجەم رزگاربووەکان بەمەبەستی چارەسەریی و پشوودان گەیەنراونەتە دورگەی لۆرێس.
دەریای ئیجە بە رێرەوێکی سەرەکی کۆچبەرانی ئاسیا و ئەفریقا دادەنرێت بۆ ئەوروپا. بەگوێرەی ئامارەکانی نەتەوەیەکگرتووەکان، تەنها لەمساڵدا 15 هەزار کۆچبەر لەرێگەی وشکانی و ئاوییەوە گەیشتوونەتە یۆنان.
هاوکات بەگوێرەی رێکخراوی کۆچی نێودەوڵەتیی، تەنها لەمساڵدا 1800 کۆچبەر لە رێگای دەریای ناوەڕاستەوە گیانیان لەدەستداوە یان لە رێگادا بێسەروشوێن بوون.
