زووم، ئاژانسەکان
هەفتەیەکە دوورگەی رۆودز لە یۆنان روبەڕوی ئاگرێکی گەورە بووەتەوە، کە بەهۆیەوە زیاتر لە 20 هەزار کەس لە دورگەکە ئاوارەبوون و لەرێگەی فڕۆکەوە گوازراونەتەوە.
بەشێکی زۆری خەڵکی لە قوتابخانە و فڕۆکەخانەکاندا دەمێننەوە. بەهۆی زۆری لۆدی سەر فڕۆکەخانەکانەوە، گەشتیاران دەبێت چەندین کاتژمێر لە فڕۆکەخانەکاندا بمێننەوە بۆئەوەی بەپەلە دورگەکە جێبهێڵن.
ئاگرەکە ئەمڕۆ سێشەممە پێی نایە رۆژی حەوتەمەوە و بەهۆیەوە چەندین باڵەخانەی دورگەکە زیانیان بەرکەتووە. بەهۆی ئەوەی دورگەکە ناوچەیەکی گەشتیارییە، ژمارەیەکی زۆر گەشتیار ساڵانە لەوەرزی هاویندا روی تێدەکەن، بەڵام ئەمساڵ بەهۆی ئاگرەوە گەشتیاران ناچارن بەپەلە هۆتێل و خانووە گەشتیارییەکان جێ بهێڵن.
بەهۆی بەرزی پلەکانی گەرما لەو دورگەیە و بەهێزی با تێیدا، سەدان تیمی ئاگرکوژێنەوە خەریکی کۆنترۆڵکردنی ئاگرەکەن، دۆخەکە هێندە سەختە تیمی هاوکاری لە وڵاتانی تورکیا و سلۆڤاکیاش بەشدارن لە کوژاندنەوەی ئاگرەکە و بەهاناوەچوونی لێقەوماوانەوە.
بەهۆی زۆری ژمارەی ئەو کەسانەی کە لە دورگەکەدا ئاوارەبوون، رووداوەکە بە گەورەترین کارەساتی مرۆیی ئاوارەبوون دادەنرێت لە مێژووی وڵاتەکەدا. بەهێزی ئاگرەکەش لەماوەی 16 ساڵی رابردوودا وێنەی نەبووە.
دوکەڵی ئاگرەکە هێندە زۆرە بەشێکی بەرەو یۆنان رۆیشتووە و پلەکانی گەرما لەو وڵاتەدا 5 بۆ 7 پلە لەکاتی ئاسایی بەرزتر بوونەتەوە کە لە ئێستادا لەنێوان 40 بۆ 45 پلەی سیلیزیدایە.
ئاگرەکە بەرەبەیانی ئەمڕۆش بەردەوامبووە و لە ئاسمان و زەمینەوە تیمەکان خەریکی کوژاندنەوەی ئاگرەکەن. بەڵام بەهۆی بەهێزی باوە کاری تیمەکان سەختتربووە.
بەهۆی بەرزی پلەکانی گەرما و ئاگرەکەوە چەند وڵاتێک هۆشدارییان داوەتە هاوڵاتییانیان، کە سەردانی ئەو دورگەیە نەکەن، بەڵام گەشتکردن بۆ ناوچەکانی دیکەی ئەو وڵاتە ئاساییە. ئەمەش لەکاتێکدایە، کە کەرتی گەشتیاریی یۆنان لەسەدا 18ی داهاتی وڵاتەکە پێکدەهێنێت و لەهەر پێنج هەلێکی کار یەکێکیان کاری گەشتیارییە. هەر بۆیە پێشبینی دەکرێت ئاگرەکان زیانێکی زۆریان بەر کەرتی گەشتیاریی وڵاتەکە گەیاندبێت.
