نێردەی حەجی عێراقی پلەی یەکەمی لەنێوان نێردەی وڵاتانی ئیسلامی لە وەرزی حەجی ئەمساڵ بەدەستهێنا بەهۆی دابینرکدنی بەرزترین پێوەرەکانی خزمەتگوزاری بۆ حاجیان.
لە ئاهەنگێکدا کە وەزارەتی حەج و عەمرەی سعودیە لە مەککە سازیکردبوو، نێردەی حەجی عێراقی خەڵاتی گەورەی وەک باشترین نێردەی حەج بەدەستهێنا بۆ پێشکەشکردنی بەرزترین ئاستی تایبەتمەندی و پێوەری داواکراو لەلایەن وەزارەتی حەج و عەمرەی سعودی.
سامی مەسعودی، سەرۆکی نێردەی حەجی عێراقی لە ئاهەنگەکەدا سوپاسی وەزارەتی حەجی سعودیەی کرد بۆ ئەو خزمەتگوزارییانەی کە پێشکەشی حاجیانیان کردووە و گوتی، “هیچ کێشەیەک نەبووە ئێمە بردبێتمانە لای وەزارەتی حەج چارەسەری نەکردبێت.”
پێوەرەکان خۆی دەبینێتەوە لە دابینکردنی باشترین خزمەتگوزاری بۆ گواستنەوەی حاجیان، باشترین شوێنی حەوانە و پێشکەشکردنی خواردن و خزمەتگوزارییەکانی تر، ئەمساڵ بۆ یەکەمجار لە مێژوودا، نێردەی حەجی عێراقی خواردنی شەوانەی بۆ حاجییەکان دابینکرد.
لەوبارەیەوە، محەمەد شیاع سودانی، سەرۆکوەزیرانی عێراق پیرۆزبایی لە نێردەکە و تیمەکانی کرد و گوتی، ئەوە رەنگدانەوەی رێکخستنی جوان و بەدواداچوونی نێردەکەیە بۆ کاروباری حاجیان و پێشکەشکردنی ئەوپەڕی خزمەتگوزارییە بۆ هاوڵاتیانی عێراقی لە هەموو شوێنێکی جیهان.
ئەمساڵ 33 هەزار و 623 کەس لە عێراق و هەرێمی کوردستانەوە بۆ بەجێهێنانی فەریزەی حەج چوونە سعودیە.
