زووم:
رۆژەکانی فیفا کۆتاییانهات، لەمڕۆوە خولە ناوخۆییەکانی ئەوروپا دەستپێدەکەنەوە، ئەم هەفتەیە پڕ دەبێت لە یاریی لوتکە و کلاسیکۆ.
لوتکەی مۆدێرنی پریمەرلیگ
لە خولی ئینگلتەرا، یاریی لوتکەی نێوان مانچستەر سیتی و لیڤەرپول ئەنجامدەدرێت. ئەگەر هەیە تیمەکەی یۆرگن کلۆپ ببنە بەربەست لەبەردەم گواردیۆلا و لەولاشەوە خزمەتێک بە ئارسناڵی یەکەمی ریزبەندیی بکەن.
ئێستا لە پریمەرلیگ ئارسناڵ بە 69 خاڵ یەکەمە و هەشت خاڵ لەپێش مانچستەر سیتییە، بەڵام یارییەک زیاتری کردووە.
لیڤەرپولیش شەشەمە بە 42 خاڵ و هیچ هیوایەکی بە بردنەوەی نازناوی ئەم وەرزە نەماوە.
لوتکەی دووەمی پریمەرلیگ
هەر ئەم هەفتەیە روبەڕوبونەوەی نێوان مانچستەر یونایتد و نیوکاسڵیش تاموچێژی زیاتر بە هەوادارانی پریمەرلیگ دەبەخشێت.
مانچستەر یونایتد سێیەمی ریزبەندی و نیوکاسڵیش پێنجەمە، جیاوازیی نێوانیان سێ خاڵە و شەڕی حەقیقی دەکەن بۆ گرتنی یەکێک لە کورسییەکانی وەرزی داهاتووی چامپیۆنزلیگ.
کلاسیکۆی ئەڵمانیا
لە ئەڵمانیا هاندەران چاوەڕێی کلاسیکۆی بەهێز دەکەن لەنێوان بایرن میونشن و بروسیا دۆرتمۆند.
رەنگە تاموچێژی کلاسیکۆی ئەمجارە دوو هێندە بێت، بەوپێیەی هەردوولا پلەکانی یەکەم و دووەمی ریزبەندییان گرتووە و جیاوازییەکەشیان تەنها یەک خاڵە.
بایرن میونشن کە خاڵێک لەدوایە، هەفتەی رابردوو نایگلسمانی راهێنەری دورخستەوە و بە هێنانی تۆخێلی راهێنەری پێشووی دۆرتمۆند دەیەوێت نازناوی ئەم وەرزەی لەدەست نەچێت.
لوتکەی فەرەنسا
پاریس سانجێرمانی یەکەمی ریزبەندیی خولی فەرەنسا ئەمجارەش پێناچێت دۆخی باش بێت، چونکە روبەڕوی یەکێک لە یانە عەریقەکانی وڵاتەکە دەبێتەوە.
مێسی و هاوڕێکانی بەرامبەر لیۆن دەجەنگن تاوەکو بچنەوە سەر سکەی بردنەوەکان و جیاوازیی خاڵەکانیان لەگەڵ دووەمی ریزبەندیی زیاتر بکەن.
لوتکەی لوتکەکان لە ئیتاڵیا
ناپۆلی رەنگە بیەوێت تاوەکو کۆتایی وەرز پارێزگاری لەو جیاوازییە گەورەیە بکات کە لەگەڵ یانەکانی دیکەی خولی ئیتاڵیادا هەیەتی و بە زوویی نازناوی ئەم وەرزە یەکلابکاتەوە.
ئێستا تیپەکەی مارادۆنا 19 خاڵ لە پێش دووەمی خولەکەیە، ئەم هەفتەیە یارییەکی بەهێزی لەگەڵ ئەیسی میلان هەیە، ئەگەر سێ خاڵەکە بباتەوە رەنگە وەکو دوایین بزمار بێت لە تابوتی یانەکانی دیکە و ئیدی کەس نەتوانێت تەنگی پێ هەڵبچنێت و دەستێکی خۆی بگەیەنێتە نازناوەکە.
ریاڵ مەدرید بەرامبەر رۆناڵدۆ
یانەی ریاڵ مەدریدی دووەمی ریزبەندیی لالیگا بەرامبەر ڤەلەدوەلید یاری دەکات، ئەو یانەیەی رۆناڵدۆی بەرازیلی خاوەندارێتی دەکات.
ئێستا ریاڵ مەدرید بە جیاوازیی 12 خاڵ لە دوای بەرشەلۆنە دێت.
گرنگترین یارییەکانی ئەم هەفتەیە:
سبەی شەممە 1ی نیسان
خولی ئینگلتەرا
02:30 مانچستەر سیتی × لیڤەرپول
05:00 ئارسناڵ × لیدز یونایتد
07:30 چێڵسی × ئەستۆنڤێلا
خولی ئەڵمانیا
04:30 لایپزیگ × ماینز
07:30 بایرن میونشن × دۆرتمۆند
خولی ئیتاڵیا
07:00 ئینتەرمیلان × فیۆرنتینا
09:45 یوڤنتۆس × ڤیرۆنا
خولی ئیسپانیا
10:00 ئێلچی × بەرشەلۆنە
یەکشەممە 2ی نیسان
خولی ئینگلتەرا
06:30 نیوکاسڵ × مانچستەر یونایتد
خولی فەرەنسا
09:45 پاریس سانجێرمان × لیۆن
خولی ئیتاڵیا
09:45 ناپۆلی × ئەیسی میلان
خولی ئیسپانیا
05:15 ریاڵ مەدرید ڤەلەدوەلید
10:00 ئەتلەتیکۆ مەدرید × ریاڵ بیتس
