ئەمڕۆ ڕۆژێکی خەمناک بوو بۆ عاشقانی تێنسی سەرزەوی، رۆجێ فێدرێری سویسری پاش 24 ساڵ چێژ و بردنەوە، بەگریانەوە ماڵئاوایی کرد.
دوایین یاریی فێدرێر لە پاڵەوانێتیی لیڤەر بوو، کاتێک شانبەشانی رافائیل نادالی رکابەری پێشووی، بەرگرییان لە تیمی ئەوروپا دەکرد، ئەگەرچی یارییەکەیان دۆڕاند، بەڵام زووم لەسەر فرمێسکەکانی بوو نەوەک ئەنجامی یارییەکە.
تێنسزانە سویسریە تەمەن 41 ساڵەکە، بە گریانەوە وازهێنانی یەکجارەکی راگەیاند و گوتی”رۆژێکی تایبەت بوو، دڵخۆشم نەک دڵتەنگ”
فێدرێر ساڵانێکی زۆر رکابەرێکی سەرسەختی نادال بوو، بەڵام لەدوایین یاریی خۆیدا هاوشانی یەکدی بوون، فێدرێر گوتی “یاریکردن لەگەڵ نادال دڵخۆشکەرە، سوپاس بۆ هەمووتان”.
فێدرێر لە باوکێکی سویسری و دایکێکی ئەفریقی لەدایکبووە، هاوژینەکەی وەکو خۆی یاریزانی تێنسی سەرزەوی بووە
لە ساڵی 1998ەوە وەکو یاریزانێکی پیشەگەر یاری دەکات. 1526 یاری ئەنجامداوە. 1251 یاری بردوەتەوە.
یەکێک لە شانازییەکانی مایسترۆ، گرتنی لوتکەی ریزبەندیی جیهانە بۆ ماوەی 302 هەفتە، شانازییەکی دیکەی بردنەوەی 20 نازناوی گراند سەلامە، بە کۆی گشتی 103 نازناوی بردوەتەوە.
