چوارچێوە بۆ سێ وەزارەت گفتوگۆ لەگەڵ لایەنە کوردییەکان دەکات

رۆژنامەى شەرقولئەوسەت لە ژمارەى ئەمڕۆ چوارشەممەدا بڵاویکردەوە، چوارچێوەى هەماهەنگى لە کابینەکەى محەمەد شیاع سودانى سێ وەزارەتى بۆ کورد دیاریکردووە کە وەزارەتى سیادى و خزمەتگوزارى لەخۆدەگرێت.

رۆژنامەکە لە زارى سەرچاوەیەکى باڵاوە ئاماژەى بەوەکردووە، چاوەڕواندەکرێت “دانوستانێکى ئاسان” لە نێوان چوارچێوەى هەماهەنگى و لایەنە کوردییەکان بێتە ئاراوە سەبارەت بەو پۆستە وەزاریانەى کە لە کابینەکەى سودانیدا بۆ هەردوو حزبە سەرەکییەکەى هەرێمى کوردستان تەرخانکراوە.

شەرقولئەوسەت باسى لەوەشکردووە، پارتى و یەکێتى هەریەکەیان لەتیف رەشید کە پۆستى سەرۆککۆمارى بردەوە، بە کاندیدى خۆیان دەزانن، بۆیە پاش یەکلابوونەوەى ئەو مشتومڕە، پشکى هەریەک لەو دوو حزبە لە حکومەتى تازە دەردەکەوێت.