ئیستەنبوڵ بەدەست حەوت کێشەى سەرەکییەوە دەناڵێنێت

زووم..

لە راپۆرتێکى تازەیDW ى تورکی، ئاماژە بە حەوت کێشەى سەرەکیى ئیستەنبوڵ کراوە، بەشێک لەو کێشانە دەگەڕێتەوە بۆ ئەو سەردەمەى ئاک پارتى گەورە شارەوانیی شارەکەی بەدەستەوە بووە و لەماوەى پێنج ساڵى دەسەڵاتى جەهەپەشدا نەتوانراوە چارەسەرى بنەڕەتى بۆ بدۆزرێتەوە.

سەرەکیترین کێشەی ئیستەنبوڵ ئەوەیە لەسەر هێڵى بومەلەرزەیە و لە رابردوودا بەوهۆیەوە قوربانیی زۆرى هەبووە، تائێستاش مەترسیى بومەلەرزەى لەسەرە.

بەگوێرەى راپۆرتەکەی DW ى تورکی یەک ملیۆن و 300 هەزار یەکەى نیشتەجێبوون لەو شارە لەژێر مەترسیی بومەلەرزە و رووخاندایە.

قەرەباڵغیی شەقام و کێشەى ترافیک یەکێکی دیکەیە لە کێشەکانی ئیستەنبوڵ، بەگوێرەی راپۆرتەکە هەر شۆفێرێک لە ساڵێکدا 15 رۆژ لە تەمەنى لە ترافیکى شەقامەکاندا بەسەردەبات.

کەمیی رێژەى سەوزایی کێشەیەکی دیکەی ئەستەنبوڵە ، کەمبوونەوەى رێژەى سەوزایی لە ئیستەنبوڵ بەهۆى دروستکردنى باڵەخانە و یەکەى نیشتەجێبوونەوە بۆتە باسێکى گرنگ، بەگوێرەى ئامارى دیدارى کەلتووریی شارەکانى جیهان لەساڵى 2023، لە 34 شارى جیهانى لە رووى رێژەى سەوزاییەوە، ئۆسلۆ بە پلەى یەکەم دێت بە رێژەى 64% و کەمترین رێژەى سەوزایی بە رێژەى 2.2% لە ئیستەنبوڵ بووە.

کێشەى بێئاوی و کەمکردنى ئاستى ئاو لە بەنداوەکانى سنوورى ئەو شارە، گرفتێکی دیکەی ئیستەنبوڵە و لەم ساڵانەى دواییدا سەریهەڵداوە.

هەروەها دیاردەى کۆچکردن لە شارەکانی دیکەى تورکیاوە بۆ ئیستەنبوڵ و زۆریى رێژەى پەنابەر، هەرچەندە دیاردەیەکى نوێ نییە، بەڵام لەم ساڵانەى دواییدا بەشێوەیەکى بەرچاو رێژەکە زیادیکردووە.

راپۆرتەکەی DW ى تورکی دەشڵێت، دوو گرفتی دیکەی ئیستەنبوڵ، نەبوونى پلانى تۆکمە بۆ رێکخستنەوەى شارەکە و تەواونەکردنى پڕۆژەى بەستنەوەى هێڵى میترۆى ناو شارەکە، هەروەها تەواونەکردنی پڕۆژە گەورەکانی وەک گەرووى ئیستەنبوڵن، کە تائێستا چارەسەر نەکراون و بوونەتە گرفت

ئیستەنبوڵ گەورەترین شارى تورکیایە، ئامارى فەرمیی دانیشتوانەکەی لە ساڵى 2023، زیاترە لە 15 ملیۆن و 900 هەزار کەس، ئەمەش دەکاتە 18.6%ی کۆی دانیشتوانی تورکیا.

لە رووى گەشتییارییەوە بەگرنگترین شاری وڵاتەکە دادەنرێت، بە گوێرەى ئامارى وەزارەتى کەلتوور و گەشتیاریی تورکیا، لە ساڵى 2023دا زیاتر لە 16 ملیۆن و 51 هەزار گەشتیار لەسەرتاسەرى جیهانەوە سەردانى ئیستەنبوڵیان کردووە.

 

هەواڵی زیاتر

Back to top button