جموجوڵی سەربازی ئەمریکا لە هەولێرەوە بەرەو رۆژئاوای کوردستان زیادیکردووە

زووم:

دوو رۆژە جموجوڵی سەربازی سوپای ئەمریکا لە هەرێمی کوردستانەوە بەرەو ناوچەکانی رۆژئاوای کوردستان لە باکووری سوریا زیادیکردووە، ئەوەش بە گوێرەی راپۆرتێکی رۆژنامەی عەرەبی جەدید.

هەر بە گوێرەی راپۆرتەکە، کە رۆژنامەکە لە زاری دوو سەرچاوەی بەرپرس لە هەولێر گواستوویەتییەوە، هێزەکانی ئەمریکا لە ماوەی دوو ڕۆژی ڕابردوودا کەرەستەی سەربازیی جۆراوجۆریان گواستووەتەوە بۆ بارەگاکانیان لە پارێزگای حەسەکە لە رۆژئاوای کوردستان.

سەرچاوەکان راشیانگەیاندووە، لە ماوەی دوو ڕۆژی ڕابردوودا لانیکەم سێ کاروانی سەربازی، کە کەلوپەلەکانیان گواستووەتەوە، لە هەرێمی کوردستانەوە بەرەو رۆژئاوای کوردستان رۆشتوون، کە سەرچاوەکان کەلوپەلەکانیان بەکەلوپەلی تایبەت “تایبەت” وەسف کردووە، بەبێ ئەوەی زانیاری زیاتر لەبارەی کەلوپەکان بخەنەڕوو.

سەرچاوەکان ئاشکراشیانکردووە، کەلوپەلەکان لە بنکەی ئاسمانی حەریرەوە لە هەرێمی کوردستان بەرەو حەسەکە لەرۆژئاوای کوردستان براون، بۆ گواستنەوەی کەلوپەلەکانیش سوپای ئەمریکا رێوشێونێکی ئەمنی توندی گرتووەتە بەرەو زۆربەی جوڵەکانیش لە شەودا کراون.

ئەم جوڵە نوێیەی ئەمریکا لە هەرێمی کوردستان بەرەو رۆژئاوای کوردستان لەکاتێکدایە، لەماوەی یەک مانگی رابردوودا و دوای دەستپێکردنی شەڕی غەزە لە 7ی ئۆکتۆبەر، زیاتر لە 70 هێرش کراوەتە سەر بنکەو بارەگا سەربازییەکانی سوپای ئەمریکا لە عێراق و سوریا، بەوانەی هەرێمی کوردستانیشەوە.

گروپە چەکدارییە شیعەکانی عێراق، کە ئێران پشتیوانیان دەکات، بەرپرسیاری خۆیان لەو هێرشانە راگەیاندووە، وەک کاردانەوەیەک بۆ پشتوانییەکانی ئیسرائیل لە شەڕی غەزە، کە ئەمریکاش لە کاردانەوەی ئەو هێرشانە لە سوریاش و عێراقیش چەند هێرشێکی کردە سەر بنکەو بارەگا سەربازییەکانیان.

سەرچاوەکانی رۆژنامەی عەرەبی جەدید باسیان لەوەش کردووە، لەگەڵ گواستنەوەی کەلوپەلەکان لە هەولێرەوە بۆ حەسەکە، رۆژی دوو شەممە فڕۆکەیەکی بارهەڵگر لە بنکەیەکی سەربازی هاوپەیمانی نێودەوڵەتی بە سەرۆکایەتی ئەمریکا لەو شارە نیشتووەتەوە، بەبێ ئەوەی زانیاری زیاتر لەو بارەوە بخاتەروو.

لەلایەکی تر، بەرپرسێکی ئەمنی لە هێزی پێشمەرگە بە رۆژنامەکەی راگەیادووە، پێدەچێت ئەو بارانەی گواستراونەتەوە چەکی بەرگری و دژە فڕۆکەی بێفڕۆکەوان و مووشەک بن، ئەمەش پەیوەندی بە هێرشەکانی ئەم دواییە بۆ سەر بنکەو بارەگا سەربازییەکانی ئەمریکا هەیە.

ئەو سەرچاوەیە راشیگەیاندووە، کە ئەمریکا بەنیازە ئەمنییەتی بارەگا سەربازییەکانی توندتر بکاتەوەو بارەگای نوێش دروست بکات، بۆ ئەوەی خۆی لە هەر هێرشێک بپارێزێت، کە بکرێتە سەر هێزەکانی لە عێراق و سوریا.

هەواڵی زیاتر

Back to top button