لە بودجەی عێراق و سیمکارتی بێ خاوەنەوە بۆ پیرۆزبایی لە ئەردۆغان

زووم:

هاوکات لەگەڵ نزیکبوونەوەی لایەنەکان بۆ پەسەندکردنی بودجەی سێ ساڵی داهاتووی عێراق، ئەمڕۆ ئەنجومەنی وەزیرانی هەرێمی کوردستان لە کۆبوونەوەی ئاسایی خۆیدا پەیامێکی بۆ فراکسیۆنە کوردستانییەکان نارد.

ئەنجومەنی وەزیرانی هەرێم داوا لەسەرجەم فراکسیۆنە کوردستانییەکانی پەرلەمانی عێراق دەکات بەرگری لە مافە دەستووری و شایستە داراییەکانی هەرێم بکەن لەنێو پرۆژەیاسای بودجەی عێراقدا.

ئەم داواکارییەی ئەنجومەنی وەزیران لەکاتێکدایە بڕیارە سبەی پێنجشەممە پەرلەمانی عێراق کۆببێتەوە و پێشبینیش دەکرێت بودجەی سێ ساڵی داهاتوو پەسەند بکرێت.

هەر ئەمڕۆش لایەنەکانی نێو هاوپەیمانیی ئیدارەی دەوڵەت، کە پێکهێنەری حکومەتی عێراقن، کۆبوونەوە و گفتوگۆیان لەبارەی پرۆژەیاسای بودجەوە کردووە، بەتایبەت لەبارەی هەردوو مادەی 13 و 14ەوە کە تایبەتن بە پشکی هەرێمی کوردستان.

بە گوێرەی زانیارییەکان لایەنەکان نزیکبوونەتەوە لە رێککەوتن و پێدەچێت سبەی عێراق ببیتە  خاوەنی یاسای بودجە .

لەو نێوەندەدا ئەنجومەنی وەزیرانی هەرێم دەڵێت پشتیوانیی لە رێککەوتنەکەی نێوان هەردوو حکومەتی هەرێم و بەغداد دەکەین لەبارەی بودجەوە، کە دەرەنجامی گفتوگۆیەکی چڕ بووە و لەسەر بنەمای یاسایی و زانستی و دادپەروەرانە بووە.

هەر لە کۆبوونەوەکەی ئەمڕۆی ئەنجومەنی وەزیرانی هەرێمدا، وەزیری شارەوانیی و گەشتوگوزار باسی لە داڕشتنی کۆدی بیناسازیی کردووە لە سەرتاسەری هەرێمی کوردستاندا، ئاماژەی بەوەداوە کە بەنیازن رەوشی بیناسازیی رێکبخەنەوە.

وەزیری ناوخۆش باسی لە جێبەجێکردنی سێ بڕیاری پێشووی ئەنجومەنی وەزیران کردووە، کە یەکێکیان تایبەتە بە دیاردەی زیادبوونی سیمکارتی بێ خاوەن، ئەوی دیکەش تایبەتە بە دیاردەی ئۆتۆمبێلی بێ سەرەتا و سێیەمیشیان بریتییە لە رێکارەکانی دەستبەسەرداگرتنی چەکی بێ مۆڵەت.

ناوەڕاستی مانگی تەمموز وادەی تۆمارکردنی چەکی بێ مۆڵەت کۆتایی دێت

وەزیری ناوخۆ دەیەوێت ئەوە وەبیر خەڵک بهێنێتەوە کە ناوەڕاستی مانگی تەمموز وادەی تۆمارکردنی چەکی بێ مۆڵەت کۆتایی دێت، دوای ئەو کاتەیش ئیدی رێکاری تازە بەرامبەر ئەو کەسانە دەگیرێتەبەر کە چەکی بێ مۆڵەتیان پێ دەگیرێت.

ئەنجومەنی وەزیران لە کۆتایی راگەیەنراوەکەیاندا لەبارەی کۆبوونەوەکەی ئەمڕۆ، پیرۆزبایی خۆیان بۆ رەجەب تەیب ئەردۆغان سەرۆک کۆماری تورکیا و ئەندامانی کابینەی تازەی حکومەتی وڵاتەکە ناردووە، گوتوویانە هیوادەخوازین پەیوەندییەکانی هەرێم و تورکیا بەرەوپێشبچێت لەسەر بنەمای دراوسێیەتی باش و بەرژەوەندیی هاوبەش.

 

هەواڵی زیاتر

Back to top button