لە سودان چی روودەدات؟

زووم، ئاژانسەکان:

▪️ پاش چەند رۆژێک لە گرژیی و کۆکردنەوەى هێز، دواجار بەیانى ئەمڕۆ دۆخەکە تەقییەوە.

▪️ شەڕ لە خەرتومى پایتەختەوە دەستیپێکرد و خەریکە سەرتاسەرى وڵاتەکە دەگرێتەوە.

▪️ رۆیتەرز لە لیژنەى پزیشکانى سودانەوە: لە شەڕ و پێکدادانەکانى ئەمڕۆى سەرتاسەرى وڵاتەکەدا لانیکەم 25 کەس کوژراون و 183 کەسى دیکە برینداربوون.

▪️ ئاگرى شەڕەکە گەیشتووەتە فڕۆکەخانەى نێودەوڵەتیی خەرتوم.

شەڕ لە نێوان “سەرۆک و جێگر” دایە

▪️ عەبدولفەتاح بورهان، سەرۆکى ئەنجومەنى سیادەى سودان و فەرماندەى گشتى سوپا.

▪️ محەمەد حەمدان دەگەلۆ ناسراو بە “حمێدتى”، جێگرى سەرۆکى ئەنجومەنى سیادە و فەرماندەی هێزەکانی پشتیوانی خێرا.

▪️ هێزەکانى پشتیوانی خێرا بەناو بەشێکن لە سوپاى سودان، بەڵام فەرماندەى هێزەکە لەگەڵ عەبدولفەتاح بورهانى فەرماندەى سوپا لە ناکۆکى قوڵدایە.

▪️ گرژییەکان بۆ چەندین مانگ لەمەوبەر دەگەڕێنەوە، بەڵام چوارشەممەى رابردوو زیاتربوون، کاتێک هێزەکانى پشتیوانی خێرا بەرەو فڕۆکەخانەى سەربازیی “مروی” لە باکورى سودان کەوتنە جوڵە.

▪️ سوپا ئەو هەنگاوەى ئیدانە کرد و هۆشداریشیدا وڵات بچێتە نێو ململانێیەکی مەترسیدارەوە.

▪️ بورهان و حمێدتى لەسەر چەندین پرس ناکۆکن، هەردوولا ناکۆکن لەسەر ئەوەى لەماوەى گواستنەوەدا کێ فەرماندەى گشتى سوپا بێت.

▪️ لەسەر چۆنیەتى تێکەڵکردنى هێزەکانى پشتیوانی خێرا بە سوپا و پلە و پۆستى ئەندامانى هێزەکە ناکۆکن.

▪️ حمێدتى لە دوایین لێدوانیدا دەڵێت “بەداخەوەم بۆ شەڕکردن لە دژى گەلەکەم، بەڵام ئەو بکوژە “بورهان” ناچارى کردین”.

▪️ عەبدولفەتاح بورهانیش دەڵێت “هیچ گفتوگۆ و دانوستانێک نییە هەتا میلیشیاى “حمێدتى” یاخیبوو خۆى هەڵنەوەشێنێتەوە”.

 

هەواڵی زیاتر

Back to top button